Ата-ана, ұстаз және мектеп туралы мақала

Ата-ана, ұстаз және мектеп – тәрбие мен білім берудің тұғыры.

Ұстаздық мамандық – мемлекетіміз алдында, ата-ана алдында, шәкірт алдында және ұстаздың өзінің ар-ұяты алдында үлкен жауапкершілікпен атқарылатын қызмет.

Бүгінгі шәкірт – елімізді өркендетіп, халқымыздың қамқоршысы болатын, мемлекетіміздің ертеңгі тірегі, ел азаматтары.

Қоғамның білімді, саналы, туған елін, жерін сүйетін, халқы үшін қажымай, талмай еңбек ететін, ғылымның жаңа жетістіктерінде табыстарға жететін азаматтарын тәрбиелеу, өсіру – ата-ананың, ұстаздардың, білім ордаларының алдындағы өте жауапты міндет.

Бірде жас ана сәбиімен атақты педагог А.С. Макаренкоға келіп: «Сәбиімді қалай тәрбиелеймін?» -депті.

Педагог:

Сәбиіңе неше ай? –депті.

Жас ана:

6 ай – депті.

Сонда ұлы педагог А.С.Макаренко:

6 ай кешігіпсіз – деген екен.

Бала тәрбиесі отбасынан басталады.

Ата-ана баласы дүниеге келісімен адалдыққа, әдептілікке, еңбекқорлыққа, мейірімділікке, үлкенді сыйлауға, бір-біріне көмектесуге, тазалыққа, ұқыптылыққа, айтқан уәдесінде тұруға үйретуге міндетті.

Сәбиді «кішкентай ғой» демей, шамасы келетін жұмыстарды тапсырып, қадағалап отырған жөн.

Еңбекқор бала келешекте нанын тауып жеп, өмір сүре алады.

Мектепке дейін бала бойында адалдық, үлкенді тыңдау, сыйлау, уәдеде тұру, өз қатесін мойындап кешірім сұрай білу, еңбек ете білу сияқты тәрбие негіздері қалыптасып келеді. Отбасында жалқау болып өскен бала өмірде жалқаулыққа жол беріп отырады.

Мектеп табалдырығын аттаған баланың бойындағы тәрбие негіздерін ұстаз білім берумен ұштастыра ары қарай дамытып, қалыптастырып отырады.

Қай кезде болса да балаға ата-ана мен ұстаздың өздерінің жеке тұлғалары, іс-әрекеттері, сөйлеген сөздері, жүріс-тұрысы, киім киісі, жан-жақты білімділігі, өнері үлгі.

Ата-ана мен ұстаздың жеке тұлғасы – «мынаны сүйт, мынаны бүйт» деп, айқайлап айтып тұрмайтын, әр сәтте көзге көрінбей ата-анадан балаға, ұстаздан шәкіртке беріліп тұратын бейімділік, айқын үлгі.

Ұстаз өзінің алдындағы балаларды «кішкентай ғой», «жас қой» деп ойламауы керек. Сыныпта қанша шәкірт отырса, сонша сыншы отыр деп түсінуі тиіс, сондықтан ұстаз өзінің айтатын сөздеріне, жүріс-тұрысына, киім киісіне, бет-бейнесіне мұқият болуы қажет. Кейде ұстаз әр сөзінің алдында «жаңағы, жаңағы», «мысалы, мысалы» деген қажетсіз сөздерді қайталай берсе, сабақта ұстаздың осы сөздерді неше рет айтқанын санап отыратын да шәкірт болады.

Мұғалім 45 минуттың 1 минутын да қажетсіз сөздерге сырап етпей, білім беруге ұқыпты, мұқият, сапалы пайдаланып шәкірттердің алған білімінің нәтижесін, деңгейін бақылап, біліп отыруы қажет.