Атыраудың төзімді жануары жобасы, мектепке дейінгі балалар

Жоба тақырыбы: «Атыраудың төзімді жануары» жобасы.

Жобаға қатынасушы : «Гүлдер» тобы балалары мен ата-аналар

Жобаның мерзімі: қысқа мерзімі

Мақсаты: Атырау өңірінің табиғатына төзімді мекендейтін жануарлары мен танысып, оларды қамқорлауға тәрбиелеу. Түйенің адамға тигізер пайдасын білу. Жануарларды қорғау, күтіп-баптау сезімдерін жетілдіруді жалғастыру.

Міндеті: танымдық білімдерін дамыту, өз халқының салт- дәстүрлерін қадірлей білуге , асыл мұраларын, өнерлерін құрметтеуге тәрбиелеу.

Өзектілігі: Қазақ халқында ата- бабамызбен бірге жасасып келе жатқан түйе жануарының қыр- сыры туралы ұғынып, түйенің сүті, жүнін және суық пен ыссылыққа шыдамдылығын зерттеу.

Әдіс-тәсілдер: зертеу, әңгімелеу, сөздік , сұрақ –жауап, көрсету , интерактивті тақта қолдану.

Түрі: ата-анамен жұмыс, жеке және топтық жұмыстар.

Жобаны жүзеге асыруға арналған қажетті көрнекіліктер:

-интерактивті тақта, видио түсірілім, сурет жинақтары, жүннен жасалған бұйымдар, қолөнер бұйымдары, түйе сүтінің өнімдері

«Түйеші ауылында қонақта»

(«Төзімді жануар түйе» жобасының қорытындысы)

Тәрбиеші:

Сәлеметсіздер ме, құрметті қонақтар!

-Балалар, мен сіздерді қонақтармен бірге түйешінің ауылына қонаққа шақырамын.

Түйеші:

-Маған қонаққа балалар келе жатқан секілді. Барып қарсы алайын.

Тәрбиеші:

-Сәлеметсіз бе, ата.

Түйеші:

-Амансыңдар ма, балалар!

Тәрбиеші:

- Біздің балалар түйе туралы алған өз білімдерін сізбен бөліскісі келіп арнайы келдік.

Түйеші:

-Қош келдіңіздер, өте қуаныштымын. Төрге шығып, ыңғайланып отырыңыздар, назарым сіздерде.

Тәрбиеші:

Біз балабақшада «Түйе» жобасы бойынша жұмыс жасадық. Түйені жан-жақты зерттеп, түйенің дене бітімі, пайдасы туралы білдік. Түйе туралы тақпақ, мақал-мәтел, жұмбақ, тыйым сөздерді жаттадық. Түйе туралы тақпақ айтайық. Ал, балалар қайсыңыз айтасыз?

1.Жібек жүні үлбіреген

Самал желмен желбіреген,

Салады ойнақ жас бота

Қош жанары мөлдіреп.

Қайқаң қағып өр төсі

Бүлкілдейді өркеші

Бұла кұші тасыған

Ауылдың ол еркесі

Маң-маң басып үнемі

Кең адырда жүреді

Өріске өрсе боталар

Қырдың кірер реңі

Аяғын жай басады

Белден белге асады

Көгал жерге жайылмай

Сортаң жерге қашады

2.Ойсыл қара –келенің

Күркіреген бурасы

Үлпілдеген желегі

Жалпылдаған шудасы

Тіздеп қойсаң маң басқан

Тұзға қарай емінер

Екі өркешін қоң басып

Түзде жүріп семірер

Мойыны иір қобыздай

Қос баладай өркеші

Көзі жанған жұлдыздай

Паң даланың еркесі

Түйелер де бағалы

Төрт түліктің төресі

Киесі мен өресі

Түйеші:

-Өте жақсы, рахмет.

Тәрбиеші:

- Ал, енді, балалар түйе туралы мақал-мәтелдер айтады (мақал-мәтелдерді айтады).

-Түйесі бардың киесі бар.

-Жылқы малдың патшасы, түйе малдың қасқасы.

-Түйе қашып, жүктен кете алмас.

-Төрт аяқтыда бота, екі аяқтыда құрдас тату.

-Түйе ботасымен жарасты.

Тамақ батасымен жарасты.

- Нар жолында жүк қалмас,

Бақырауық демесең.

- Бағалы көлік түйе ғой.

Түйеші:

-Иә, балалар, түйе туралы білімдерің жақсы екен. Ал, енді мен сендерге келесі сұрақтарды қойғым келіп тұр. (Түйеші балаларға сұрақтар қояды)

Түйе қандай жануар? (түйе үй жануары) (слайд 2)

Түйені қазақ, орыс, ағылшын тілінде қалай атайды? (түйе, верблюд, кэмл)

Түйені неліктен үй жануары деп атайды? (себебі, түйені адамдар аулада ұстап, бағады)

Түйенің дене бітімі қандай? (түйенің басы, екі көзі, екі құлағы, екі немесе бір өркеші, төрт ұзын аяғы, жалпақ табаны, құйрығы болады) (слайд 3)

Түйенің ерекшелігі қандай? (түйе өте төзімді жануар, ыстыққа, шөлге шыдайды)

Түйе қанша уақыт сусыз жүре алады? (түйе бірнеше тәулік бойы, отыз күндей су ішпей жүре алады)

Түйе немен қоректенеді? (түйе жантақ, жусан, шытыр, қияқ, қамыс шөптерін жейді) (слайд 3)

Түйені қалай шақырады? (түйені шақырғанда «көс-көс» дейді)

Түйенің төлін қалай атайды? (түйенің төлін бота дейді) (слайд 4)

Түйенің неше өркеші болады? (түйе бір өркешті, екі өркешті болады) Бір өркешті түйе қалай аталады? (бір өркешті түйе «нар» деп аталады) (слайд 5)

Түйені не үшін пайдалануға болады? (түйемен ауыр заттарды тасуға болады, алыс жолға көлік ретінде пайдалануға болады, ертеде мұнай тасыған, арба жеккен) (слайд 6)

Түйенің пір атасы не? (ойсылқара)

Сендерді әке-аналарың жақсы көргенде қалай атайды? (жаным, көкем, күнім, ) Ал, енді, түйеге байланысты қандай сөздер айтады? (ботам, боташым, ақботам, ботақаным)

Түйеге қатысты қандай ертегілерді білесіздер? («Жыл басына таласқан хайуантаттар», «Түйе, арыстан, қасқыр, түлкі және бөдене», т.б.

Түйе несімен пайдалы? (түйе сүтімен, жүнімен, өркешімен, етімен пайдалы)

Түйеші:

-Ой қандай тамаша, түйе туралы көп біледі екенсіңдер. Жарайсыңдар, балалар.

Тәрбиеші: