Бабадан қалған ұлы аманат туралы мерекелік құттықтау

Бабадан қалған ұлы аманат

Биыл азаттықтың ақ таңы – Тәуелсіздікке 30 жыл. Баршаңызды төл мерекемен шын жүректен құттықтаймын.

Тәуелсіздік – түп шежіресі сақтар, ғұндар мен түркілерден бастау алатын, тарихы қатпарлы, «мың өліп, мың тірілген» қаймана қазақ халқы үшін баға жетпес құндылық, бабалардың ұлы аманаты.

Мемлекет басшысы Қасым-Жомарт Кемелұлы 2021 жыл – Тәуелсіздіктің 30 жылдығы деп жариялады. Дүйім жұртқа өткенімізді саралап, болашақтың бағыт-бағдарын айқындаған «Тәуелсіздік бәрінен қымбат» идеологиялық мақаласын жолдады. Мемлекет басшысы: «Бостандық бізге оңайлықпен келген жоқ. Ата-бабаларымыз азаттық жолында арпалысты. Талай зұлмат замандар мен нәубеттерді басынан өткерді. Осының бәрі халықтың есінде сақталып, ұрпақтан ұрпаққа берілуге тиіс», - деп атап өтті. Иә, тарихқа көз жүгіртсек, Алтайдан Атырауға, Алатаудан Арқаға дейінгі ұлан-ғайыр атырапты сақтап қалу оңайға тиген жоқ. Баһадүр бабалар жау жағадан алған замандарда ел ертеңі үшін атқа қонып, қылыш сермеді. Алапат ашаршылық пен жаппай қуғын-сүргін көрді. Кешегі Әлихан Нұрмұхамедұлы бастаған Алаш арыстарының да аңсары – егемендік еді.

Бүгінде бабалардың асыл арманы орындалып, тәуелсіздіктің іргесі қаланды. Ұлттық шекара шегенделді. Дербес Қазақстан республикасы әлемдік қауымдастыққа танылды.

Заңғар жазушы Әбіш Кекілбайұлы: «Тәуелсіздік – тәтті сөз ғана емес, ұлттық жауапкершілік. Тәуелсіздігімізді сырттың алакөздігінен, іштің алауыздығынан аман сақтап қалу – біздің тарих алдындағы басты парызымыз», - деп тұжырымдады. Ендеше баршамыз қастерлі тәуелсіздігімізді тұғырлы ету жолында қызмет атқарайық.

Ұлы дала елі мәңгі жасасын!