Бала шақтан болашаққа тәрбие сағаты 1 сынып

Самғатқан сан қыранды-бастауышым!

Мақсаты: Білімнің сара жолы бастауыштан басталатынын, бастауышта алған білімнің негіз болып қалатынына көз жеткізу.

Мектепті, ұстаздарды құрметтеп, еңбектерін бағалай білуге, өз Отанын адал ұлы мен қызы болуға тәрбиелеу.

Білімге деген құштарлығын арттыру, білімді болуға шақыру, ақыл, ой-өрісін дамыту.

Көрнекілігі: қанатты сөз, мақал-мәтелдер, слайдтар, гүлдер және шарлармен сахнаны безендіру.

Музыка ойнап тұрады: «Балалық шақ» күйі

І-жүргізуші:

Армысыздар, мұғалімдер, әз жандар,

Білім іздеп инемен құдық қазғандар.

Сан ұрпақты тәрбиелеп оқытқан

Өмір деген үлкен жолды шарлаңдар.

Бүгін міне қоштасады бастауышпен балбұлақ,

Әні менен жырына, тарландарым сал құлақ.

Кеше сәби, бүгін міне жас ұлан,

Лаулап жансын балалығың шамшырақ.

ІІ-жүргізуші:

Армысыздар әжелер мен аналар,

Ұрпағыңыз күнде өзіңнен бата алар.

Ел дәстүрін мәңгі сыйлап оқы деп,

Үйреткен ғой Абай, Ыбырай бабалар.

І-жүргізуші:

Армысыздар өр тұлғалы әкелер,

Қыран құстай балапанын жетелер.

Бүгін міне бастауышпен қоштасады,

Азамат боп кешегі сәби еркелер.

ІІ-жүргізуші: Адам баласының есінде ерекше сақталып, үлкен өмірге дайындайтын білім ордасы-мектеп. Қызығы мен шыжығы мол күндер осы мектеп қабырғасында өтеді.

І-жүргізуші: Және білім нәрімен сусындатып, алғаш қолға қалам ұстатып, үлкен өмірге дайындаған ұстаз мәңгілік есте қалады. Назарларыңызға 4-сыныппен қоштасу кешіне арналған

Бірге: «Самғатқан сан қыранды- бастауышым!» атты мерекелік кешімізді бастауға рұқсат етіңіздер!

ІІ-жүргізуші: Білім сыйлап балаға еңбек еткен,

Самал сөзі аймалап, сүйген беттен.

Шәкіртінің естісе ерліктерін

Қуаныштан көңілі көкке жеткен

І-жүргізуші: Сабақ берген шын ынта, пейілімен,

Баулыған бар ұрпақты зейінімен.

Жасай берсін, ұстазым, жасай бергін,

Даласындай қазақтың кең пейілді- деп, ақын ұстаздарға өз жүрек жарды сырын арнағандай, алдарыңызда 4-сыныптың жетекшісі Саметова Әлия апай мен Нақипова Жазира апайымызды қарсы алайық.

Мұғалім:

Бүгін міне жақсы күн жарқыраған,

Көңілдер қуаныштан сарқыраған.

Қоштасатын күн келді бастауышпен,

Қиындау болып тұр-ау бүгін маған.

Кеше ғана алдыма келген еді,

Именіп ұлы ұяға енген еді.

4 жыл бойы сусындап білімменен,

Ұшатын қанат қағып келді кезі.

Кеше ғана тұлымдары желбіреп, жүректері лүпілдеп мектеп табалдырығын қуана аттаған оқушыларым ойлары толып, бойлары өсіп бастауыш сатысымен қоштасқалы отыр. Бұл салтанат қуаныш баршамызға ортақ.

Мұндай күй болған сірә қаншаңызда,

Тілеймін ұстаздар баршаңызға.

Қол соғып, қошеметтеп шақырайық,

Бүгін менің сүйікті шәкірттерім ортаңызда

(Оқушылар ортаға шығады, қоңырау соғылады)

ІІ-жүргізуші: «Жақсы мұғалім - мектептің жүрегі» - деп бекер айтылмаған. Жүрексіз өмір болмаса, мұғалімсіз білімнің, тәрбиенің іске аспайтыны белгілі. Ендеше 4 жыл бойы ұстаздарымыздан алған білімдерімізді көрсетейік.

Шұғыла: Армысыздар, ардақты ұстаздар, қадірлі қонақтар, оқушылар. Бүгін біз бастауышпен қоштасып, үлкен өмірге аттанғалы отырмыз.

Ернұр: Иә осыдан 4 жыл бұрын , біз 6 жастағы сәби -балалар сөмкемізді зорға көтеріп, мектеп табалдырығын жасқана аттаған едік.

Сандуғаш: Енді міне сауатымызды ашып, білім негізін қалаған бастауыш мектеппен қоштасып, орта буын қатарына қосылғалы тұрмыз.

Азамат: Иә, міне сағымдай өте шыққан 4жыл ішінде біздің ұстаз анамыз сауатты, тәрбиелі, өнегелі азамат етіп шығарды.

Тоғжан: Ендеше бастауыш сыныбымыз туралы неге айтпасқа ?

Арайлым:Жасқана кіріп жарық сыныпқа біз.

Әр бетін Әліппенің күле ашқанбыз.

Мұғалім сабақ өтіп жатқан кезде,

Қайталап атымызды сұрасқанбыз.

Ернұр: Әр үйдің ерке өскен тентегі едік, Ақылға келе алмадық ерте көніп. Бойымыз бірте-бірте үйренісіп, Мектептің ережесін үйрендік кеп.

Аружан: Бастауышта шырқалмаған жыр бар ма?

Бастауышта айтылмаған сыр бар ма?

Бастауышта алған білім, жырларым,

Азық болар , мәңгі талай жылдарға.

Еркемай: Бастауышым – бал бұлағым , Алдым сенен балдың дәмін. Әріп танып, білім алып Рахметімді жаудырамын

І-жүргізуші:

Ақырын жүріп, анық бас,

Еңбегің кетпес далаға.

Ұстаздық еткен жалықпас,

Үйретуден балаға – деген Абай атамыздың сөзі, алғаш қолымызға қалам ұстатып, оңымызбен, солымызды танытқан, бізбен бірге қуанып, 42 әріпті танытып, білім нәрімен сусындатқан, мектептегі анамыз ұстаз екені бәрімізге мәлім. Балалардың ұстазға арнаған ән-жырларын айтпас бұрын, ұстаз туралы не айтар едің?

Аружан: Ұстаз – дана.Әр шәкіртін өз баласынан кем көрмей, оқуға, жазуға үйреткен мұғалім еңбегі шексіз.

Аделя: «Мұғалім – мектептің жүрегі» - деп Ыбырай атамыз бекер айтпаған. Олай болса, келесі жырларымызды ұстаздарымызға арнаймыз.

Аяла:

Маған ұстаз үйретті,

Әліппесін өмірдің.

Жан жүйемді билетті,

Күйі шалқып көңілдің.

Қиялымды кездірді,

Таптым ойдың тұрағын,

Маған ұстаз сездірді,

Алдағы өмір шырағын.

Дарын:

Ұқсаттыңыз сіз бізді балаңызға,

Ұқсатып ек біз сізді анамызға.

Жақын тарттық, біртіндеп бауыр бастық,

Жүрегіңді ұнаттық арамызда.

Шұғыла: Алғашқы ұстазымыз анамызбен тең келеді, Бар асылын бізге жиып, мол береді. Қанатымен су себелеп асыл жан Әр шәкіртін баласынан кем көрмейді.

Аделя: Тек үйреттің әділдікті , адалдықты, Жирендік, ажыраттық жамандықты. Жалғастырар ақ жолың сенің салған, Бар деп ұққын әрқашан балаң мықты.

Жансая: Қоңыр үнді даусың әсем таңдардай, Ұстазымның жүзіндегі нұр қандай ! Мейірлене қарап қойып біздерге Күн астынан сабақ беріп тұрғандай.

Нүрила: Ұстазым ! Ұстазым өзің едің асқақ әнім Басталған ақ батаңнан жас талабым. Ұғындым ұлылықтың , даналықтың Ұстаздың ұлағатынан басталарын.

Ән: «Ұстазым». Орындайтын: Есбосын Аделя және Шалдарбек Ернұр.

Жібек: Армысың сен, алтын ұя мектебім,

Саған айтар жыр алғысым көп менің.

Жүректерге жаққан білім шырағым,

Мектебіме арналады бұл әнім