Басқару психологиясы және тұлғалық даму тәжірибесі

БАСҚАРУ ПСИХОЛОГИЯСЫ – КӘСІБИ ЖӘНЕ ТҰЛҒАЛЫҚ ДАМУДЫҢ НЕГІЗІ

Әл-Фараби атындағы Қазақ ұлттық университетінде «Физика пәні мұғалімдерін даярлау» мамандығы бойынша магистратурада оқу – менің кәсіби және тұлғалық дамуымдағы маңызды кезеңдердің бірі болды. Екінші семестрде оқытушы Тленчиева Нұржамал Сейдалиевна жүргізген «Басқару психологиясы» пәні мен үшін ерекше әсер қалдырған, мазмұны терең әрі тәжірибелік маңызы зор курс болды.

Бұл пән өзінің құрылымы мен өткізу форматы жағынан басқа пәндерден айрықша екенін алғашқы сабақтан-ақ көрсетті. Мұнда дәстүрлі лекция немесе тек ақпаратты тыңдаумен шектелмей, студенттің белсенділігін, ойлауын, рефлексиясын дамытатын интерактивті әдістер қолданылды. Әр сабақ – бұл тренинг, топтық жұмыс, рөлдік ойын және арт-терапия элементтерін біріктірген, терең ойлауға итермелейтін тәжірибе алаңы болды.

Маған ерекше әсер еткен сабақтардың бірі – көшбасшылық қабілеттерді анықтауға арналған тренинг болды. Бұл тренинг барысында мен өз бойымдағы көшбасшылық қасиеттерді айқын байқадым, өзіме деген сенімім артты. Коммуникативті дағдыларымды жетілдіріп, топ ішінде өз рөлімді дұрыс таңдай білу, шешім қабылдау жолдарын меңгеру – кәсіби ғана емес, өмірлік маңызды дағдыларымның қалыптасуына ықпал етті.

Оқытушы Тленчиева Нұржамал Сейдалиевна сабақты өте жоғары деңгейде өткізді. Оның кәсіби шеберлігі, жан-жақты әдістемелік дайындығы мен студентпен тең дәрежеде жұмыс істеуге деген ұмтылысы – курс мазмұнын әсерлі, қызықты әрі пайдалы етуге сеп болды. Оқытушы әр студенттің ерекшелігін ескеріп, мотивациясын оятып, ынталандырып отырды.

Арт-терапия сабақтары ерекше есте қалды. Бұл сабақтар ішкі жан-дүниемізді шығармашылық жолмен түсінуге мүмкіндік берді. Эмоцияларымызды бейнелеу, өмірлік мәселелерімізді метафора арқылы жеткізу – өзімізді танудың тиімді тәсілі болды.

Курс барысында алынған білім мен дағдыларды тек теория жүзінде емес, тәжірибеде, күнделікті өмірде және педагогикалық қызметте қолдануға мүмкіндік алдым. Пән тек басқару саласында емес, сонымен қатар эмоция, уақыт, мотивация секілді ішкі ресурстарды тиімді басқаруға да көмектесті.

«Басқару психологиясы» пәні мен үшін – жай ғана академиялық пән емес, кәсіби және тұлғалық дамуыма жол ашқан маңызды қадам болды. Бұл курс мені өзімді жақсырақ тануға, сенімді шешім қабылдауға, топта үйлесімді жұмыс істеуге, жан-жақты тұлға ретінде қалыптасуға жетеледі.

Тленчиева Н.С.