Бейбіт мектеп өмірі туралы директорға арналған мақала

БЕЙБІТ МЕКТЕП ӨМІРІ – БІРЛЕСКЕН ЕҢБЕКТІҢ ЖЕМІСІ

Қоғам дамуының бүгінгі кезеңінде өскелең ұрпақтың жан-жақты дамуы, олардың рухани және моральдық тұрғыда қалыптасуы маңызды мәселелердің біріне айналып отыр. Мектеп қабырғасындағы бала тәрбиесі мен тәртібі – ел ертеңі саналатын жас буынның адами құндылықтарды бойына сіңіруінің алғашқы баспалдағы. Әсіресе, балалардың қауіпсіз білім алуына жағдай жасау, олардың өздерін еркін әрі сенімді сезінуіне мүмкіндік беру – кез келген білім беру мекемесінің басты қағидаларының бірі. Осы орайда Е.Бозғұлов атындағы №249 мектеп-лицейінің ұжымы оқушы қауіпсіздігі мен құқықтық тәрбиені бірінші орынға қойып, бұл бағытта кешенді жұмыстарды жүйелі жүргізіп келеді. Әрбір оқушының мектепте өзін жайлы сезінуі, айналасындағы ортаға сеніммен қарауы – мектептің тәрбие мен білім берудегі басты жетістігінің көрсеткіші.

Біздің білім ордамызда соңғы үш жыл көлемінде (2022–2025 жж.) қылмыстық құқықбұзушылықтар мен суицид әрекеттерінің бірде-бір фактісі тіркелмеген. Бұл – кездейсоқ нәтиже емес, мұғалімдердің күнделікті елеусіз көрінетін, бірақ маңызды тәрбие жұмыстарының, ата-аналармен тұрақты байланыстың, құқық қорғау органдарымен өзара әрекеттестіктің және, ең бастысы, мектеп ішінде қалыптасқан сенімді атмосфера мен тәртіптің нақты нәтижесі. Қазіргі таңда жасөспірімдер арасындағы суицид әрекеттері мен құқықбұзушылықтар республика бойынша алаңдатарлық мәселе болып отырғаны жасырын емес. Осындай күрделі жағдайда біздің мектептің оң көрсеткіштерге қол жеткізуі – барлық мүдделі тараптардың бірлескен қажырлы еңбегінің жемісі деп нық сеніммен айта аламыз.

Бұл бағытта жүзеге асырылып жатқан жұмыстардың ең маңыздысы – профилактикалық алдын алу шаралары. Мектеп қабырғасында жыл бойына оқушылар арасында құқықтық сауаттылықты арттыруға, адамгершілік пен өзін-өзі бағалау мәдениетін қалыптастыруға бағытталған түрлі форматтағы іс-шаралар мен кездесулер тұрақты түрде өткізіледі. Атап айтқанда, “Жасөспірім және заң”, “Менің құқығым – менің міндетім”, “Құқықбұзушылыққа жол жоқ” атты тренингтер мен дөңгелек үстелдер, пікірталастар, эссе байқаулары, рөлдік ойындар мен психологиялық тренингтер оқушылардың дүниетанымын кеңейтіп, ішкі жауапкершілігін күшейтеді. Әсіресе, әлеуметтік педагог пен мектеп психологының жеке бағыттағы жұмысы ерекше маңызға ие. Оқушылардың психоэмоционалдық жағдайын бақылау, суицидке бейім белгілерді ерте анықтау және дер кезінде қолдау көрсету жұмыстары жүйелі жолға қойылған.

Оқушы тәрбиесіне тек мектеп ұжымы ғана емес, ата-аналар қауымы да белсенді араласуы тиіс. Бұл ретте ата-аналар комитетімен, жалпы мектептік және сыныптық ата-аналар жиналыстарымен тиімді байланыс орнату – біздің басты міндеттеріміздің бірі. Баланың отбасындағы ахуалы мен тәртібін, бос…