Берекелі отбасы ашық тәрбие сағаты, 2 сынып

Тәрбие сағатының тақырыбы: Берекелі отбасы

Тәрбие сағатының мақсаты: ата- ана мен бала арасындағы ізгі қарым – қатынастың орнауына ықпал ету. Отбасы құндылықтарын сақтауға үйрету. Ата – ана мен бала арасындағы сенімді сыйластықты, бір- біріне деген сезімді нығайту, бала тәрбиесінің алғашқы алтын қазығы туған ұясы, өз отбасындағы ата- ана тәрбиесі, өнегесі және баланың бас ұстазы ата – ана екенін түсіндіру.

Тәрбие сағаттың көрнекілігі: нақыл сөздер, шарлар, слайдтар.

Әдісі: пікірлесу, сұрақ-жауап, ситуациялық сұрақтар.

Түрі: сайыс.

Барысы:

Алдымен балалар тәрбие сағатымызды бастамас бұрын мынандай ойын ойнап жіберейік. Бұл ойынды мынадай жұмбақтар шешу арқылы ойнаймыз

Әкелеріңнің әкесі сендерге кім болады?

Әкелеріңнің анасы кім болады?

Отбасының тірегі кім?

Үйдегі алтын қазық кім?

Өзі әкенің ізін қуатын, ал өзінің ізін артындағыларға қуғызатын, әке жоқ кезде әке орнына әке рөлін атқаратын кім?

Ағадан кейін өмірге қыз бала келсе кім дейміз?

Құрметті ата- аналар, ұстаздар! 2 сыныбының өткізгелі отырған «Берекелі отбасы» атты ашық тәрбие сағатына қош келіпсіздер! Қазақ қоғамында отбасы – өмірдің тұтқасы, оттың маңайына жан балқытар жылуы. Қазақтың ошағы дөңгелек үйдің ішінде болады да, бүкіл жайдарлық жағылған отқа үйіріледі. Отбасының амандығы, ошақтағы оттың маздап тұруы – үмітінің өшпес алауы. Үй ішінің қызықққа, қуанышқа толы болуы да соған байланысты.Оттың басы, ошақтың қасы- ырыстың ұйытқысы. Отбасы-адам баласының түп қазығы, алтын ұясы. Адам баласын шыр етіп дүниеге келген күннен бастап сол ортаның ыстық-суығына бейімделіп, ықпалына көніп, осында ер жетеді.

Отбасы-адамзат бесігін тербеткен баланың бас ұстазы. Ұлтымызда «Ұяда не көрсең, ұшқанда соны ілерсің» деген дана сөз бар. «Балапан қыран болу ү.шін оны самғатып ұшыратын ата немесе әке де қыран болу керек» деп отбасылық тәрбиеге ерекше тоқталған. Әр отбасында ата-ананың орын бөлек. Бала әкеден ақыл, анадан мейірім алады. Әке-шаңырақ иесі. Отбасы мүшелерінің жауапкершілігі толығымен ер-азаматқа жүктеледі. Әйел-отбасының ұйытқысы. Баланы өсіріп тәрбиелеу-әйел-ананың тікелей міндеті.

Сондықтан қазақ отының басын тіршілігінің тұтқасы санап аялайды. Қазіргі қоғамда ата – ана баласынан не күтеді? Ата – ананың бақыты неде? Баласы ата – анасын қалай бақытты етпек?

Міне, осы тұрғыда сөз қозғалатын «Берекелі отбасы» атты сайысымызды бастауға рұқсат етіңіздер! Сайысқа қатысуға келген отбасыларымен таныстырайын.

1-отбасы: Байниязовтар отбасы

2-отбасы: Әлімовтер отбасы

3-отбасы: Сатжановтар отбасы

Сайысымызды бастамас бұрын әділ-қазылар мүшелерімен таныстырып өтейін.

Мектеп директорының тәрбие ісі жөніндегі орынбасары- М. Тулеева

Әлеуметтік педагог – Р. Сейтмағамбетова

Бастауыш сынып бірлестігінің жетекшісі – О. Сариева

Сайыс мынадай бөлімдерден тұрады:

Отбасын таныстыру

Ситуациялық сұрақтар

Маржан сөздер сайысы (бала тәрбиесі туралы мақал-мәтел, нақыл сөздер айту)

«Кім зерек?»

Отбасы дәстүрі

1-бөлім. Таныстыру. Отбасы мүшелері өздерін таныстырады.

Балалар өз отбасы туралы әңгімелейді.

Сенің отбасың қандай?

Сенің отбасыңда неше адам бар? Олар кімдер?

Отбасыңда сені қалай еркелетіп айтады?

Сен отбасыңдағы адамдарды қалай атайсың?

2-бөлім. Ситуациялық сұрақтар.

Бала тәрбиесіне қатысты қазаққа тән қандай қасиеттерді дұрыс деп санайсыз?

Бала үшін ата – ананың қайсысының беделі күшті деп ұғасыз?

Бала тәрбиесі үшін отбасы жауапкершілігі басым ба, әлде мектептің жуапкершілігі басым ба?

Баланы еркін тәрбиелеген дұрыс па, әлде қатаң тәрбиелеген дұрыс па?

«Кім епті?» ойынын ойнап аздап сергіп алайық. Анасы қызының шашын жинап, ал қызы анасының орамалын тағып беру керек.

Отбасының басты қазығы, алтын діңгегі –бала. Баланың жан-жақты тәрбиелі болып өсуіне берекелі, өнегелі, ынтымақты отбасының ықпалы мол.