Биология сабағында білім беру сайтын тиімді пайдалану

Ы.Ноғайбаев атындағы №18 орта мектебінің

Биология пәнінің мұғалімі:

Турманова Роза Таубаевна

Шеберлік сабағының жоспары:

ТАҚЫРЫБЫ: Биология сабағында «Bilimland.kz» сайтын пайдаланудың тиімділігі

МАҚСАТЫМЕНМІНДЕТІ:

Мұғалімдерді «Bilimland.kz» іздеу жүйесі мен құрылымдық картасын пайдаланумен таныстыру

Сайттың мүмкіншілігі мен артықшылығын ашып көрсету

Сабақта «Bilimland.kz» материалдарын тәжірибе жүзінде қолданудың тиімділігі

КҮТІЛЕТІННӘТИЖЕСІ:Мектеп мұғалімдерінің сабақ барысында «Bilimland.kz» сайтын практика жүзінде пайдала алуы.

МАҚСАТТЫАУДИТОРИЯ: мектеп мұғалімдері

ӘДІС - ТӘСІЛДЕРІ: түсіндіру, топтық жұмыс, тәжірибе жүзінде көрсету, бейнетаспа, «Bilimland.kz» сайты

ҚҰРАЛ-ЖАБДЫҚТАР: компьютер және мультимедиялық проектор, интерактивті тақта, дыбыстық құрылғы.

ШЕБЕРЛІК САБАҒЫНЫҢ БАРЫСЫ:

Бүгінгі мемлекет алдындағы басты міндет – білім беру жүйесін жаңарту болып отыр. Қазіргі білім беру саласында оқытудың жаңа технологияларын меңгермейінше сауатты, жан-жақты маман болуы мүмкін емес. Осы мақсатта оқушыларға білім беруде компьютер құрылығыларынан басқа қосымша ресурстар пайдалануды қажет етеді. Осы тұста «Bilimland.kz» сайтын атап көрсетуге болады.

Мектеп бағдарламасының негізінде жасалған ресурстар мұғалімдерге таптырмас көмекші және оқушылардың өздігінен жұмыс істеуіне мүмкіндік беретін қызықты оқыту құралы. Кез-келген пән мұғалімі іздеу жүйесін немесе құрылымдық картаны пайдалана отырып, мектеп бағдарламасы бойынша өзіңізді қызықтырған кез келген тақырыпты таба алады. «Bilimland.kz» ресурстарын сыныпта қолдану әдісі мен тәжірибесі мұғалімнің шығармашылық қабілетіне байланысты. «Bilimland» сабақтары жаңа тақырыпты түсіндіру барысында презентациялық материал ретінде, тақырыпты қорытындылау барысында тәжірибелік тапсырма ретінде немесе өткен тақырыптарды қайталау барысында қызықты көрнекті материал ретінде қолданыла алады. Тіпті оқушылар да «Bilimland.kz» ресурстарының көмегімен сыныпқа келмей тұрып жаңа тақырыппен өз беттерінше таныса алады, ал мұғалім сыныпта уақытының көп бөлігін жаңа тақырыпты түсіндіруге емес, оны талқылауға бөледі.

«Bilimland.kz» ресурстары мазмұны жағынан мектеп оқулықтарына қарағанда едәуір кең, дегенмен қағаз түріндегі оқу құралдары мен оқулықтарға балама болып саналмайды. «Bilimland» ресурстары – дәстүрлі оқыту тәжірибесін толықтыруға және кеңейтуге арналған дербес оқу кешені. Электронды оқыту ресурстарының артықшылығы – олар әрдайым жаңарып отырады. Әдіскер және пән мұғалімдерінен құралған топ – оқыту ресурстарын мазмұны жағынан қызықты әрі бірегей етіп жасау үшін әрдайым шығармашылық ізденіс үстінде болады.

Қазіргі кезде «Bilimland.kz» ресурстарын «Назарбаев Зияткерлік мектептері» жүйесіне кіретін барлық мектеп, Алматы қаласындағы халықаралық мектептер, сонымен қатар Астана қаласының, Қызылорда, Қарағанды облыстарының және Қазақстанның басқа өңірлеріндегі 350 мектеп пайдалануда.

Мемлекеттік жалпыға міндетті білім беру стандарты мен типтік оқу жоспарлары жиі өзгеріп отырғандықтан, ресурстарды жасау барысында аталған стандарт, жоспарларға сүйеніп отыр.

Білім алу- сан қилы әрекет түрін қамтитын аса күрделі әрі үздіксіз процесс. Оған қатысатын әр адамның өз қабілеті, өз ырғағы мен талғамы бар. Сондықтан да білім алу әр адам үшін ерекше процесс. Технологиялардың қарқынды дамуы, жаңа ұғымдар, бағыттар, техникалық құралдар өмірге дендеп еніп жатыр. Оған ілесу, барлығын түсініп игеру тіпті кәсіби мамандарға да оңай емес. Бірақ білім алуда біз осы технологиялардың керемет мүмкіндіктер туғызатынына сенуімізге болады. Бұл жаңалықтар баршаға қолжетімді сапалы білімге жол ашады.

«Bilimland.kz» сайтын құрушы «Bilim Media Group» компаниясы. «Bilim Media Group» компаниясы 2011 жылы құрылған. Бұл компанияның мақсаты – мұғалімдерге инновациялық технологияларды қолдану арқылы білім сапасын жақсартуда көмектесу.

Биылғы жаңа оқу жылында «BilimMediaGroup» дербес оқыту компьютер-планшеті болып саналатын «BilimBook» құрылғысын ұсынды. Бұл компьютер-планшеттің мазмұны (контенті) 40 000-нан астам интерактивті сабақтан, миллионнан аса видео анимациядан, 30 000-нан аса тест сұрағынан тұрады.

iTest платформасы жайында толығырақ айтатын болсақ, «iTest» сайты – Ұлттық бірыңғай тестілеу (ҰБТ) сынағына және қорытынды аттестаттауға дайындалуға мүмкіндік беретін виртуалды жаттықтырғыш. Cайт ресурсқа арнайы құрастырылған бірегей сұрақтар базасынан тұрады. Қазіргі таңда деректер базасында 60 000-нан аса сұрақтар мен тапсырмалар бар. Ұлттық бірыңғай тестілеуді тапсырудағы соңғы өзгерістерге сай, «iTest» орыс және қазақ тілдерінде 3 негізгі (математикалық сауаттылық, оқу сауаттылығы, Қазақстан тарихы) және 13 таңдау пәні (математика, орыс тілі, қазақ тілі, қазақ әдебиеті, физика, химия, биология, ағылшын тілі, неміс тілі, француз тілі, география, дүниежүзі тарихы, Адам. Қоғам. Құқық) бойынша дайындалуға мүмкіндік береді.

Сайттың басты артықшылығы - қорытынды аттестаттауға дайындалуға арналған бірегей, еш жерде кездеспейтін материалдар жиынтығы. Аудиолекция, видеонұсқаулар, материалдар мен мысалдарды пайдаланып үш негізгі пәндерге: Қазақстан тарихына, эссеге, алгебра және анализ бастамаларына дайындалуға болады. Сонымен қатар, порталда тек қана қорытынды аттестаттауға ғана емес, халықаралық емтихандарға тиімді дайындалуға, жалпы шет тілін үйренуге арналған лингвистикалық цикл пәндерге арналған бірегей жаттықтырғыш бар. Сонымен қатар, «iTest» платформасында қатемен жұмыс жасау мүмкіндігі бар. Оқушы қателескен сұрағына қайта оралып, дұрыс жауабы мен шешімін немесе түсініктемесін көре алады.

«BILIM MEDIA GROUP» компаниясының тағы бір көмекші платформасы «BilimBook» – сыныпта да, үйде де пайдалануға ыңғайлы, оқушының танымдық деңгейін арттырып, зейіні мен бейімін шыңдайтын бірден-бір оқыту құрылғысы. Басты мақсаты – қала мен ауыл баласы арасындағы цифрлық білім алуды теңестіру.

Бұл құрылғы Қазақстан мектептеріне интерактивті оқытудың жаңа сатысына көтерілуге мүмкіндік береді.

Сондай-ақ, «twig-bilim.kz» видеосабақтар ресурсын атап өткен жөн болар. Бұл білім беру кешені мектеп бағдарламасына енген химия, физика, биология және жаратылыстану пәндеріне арналған қызықты 1500 қысқа фильмнен тұрады. Фильмге арқау болған деректер әлемге танымал «ВВС» және «NASA» студияларының мұрағаттарынан алынған. Әр фильмге қосымша оқыту материалы ретінде иллюстрациялар мен диаграммалар, кестелер мен интерактивті тапсырмалар берілген. Аталған инновациялық платформа 19 тілге аударылып, 70-тен астам елдің білім беру жүйесіне енген.

«Вilimland.kz» платформасы – барлық жастағы балаларды оқытуға арналған курстардың жиынтығы ғана емес, жаңа заман мұғалімі мен оқушыға арналған көмекші.

Жұмыс кезеңдері:

кіріспе бөлімі

Кезеңнің мазмұны

Қатысушылардың іс-әрекеті

2 мин

Дайындық-ұйымдастырушылық

кезеңнің мақсаты: Сабақта тиімді жұмысты жүргізуді жүзеге асыруды ұйымдастыру.

Міндеттері: Қатысушылардың зейінін аудару, аудиторияда қатысушылардың тиімді және жақсы көңіл күймен жұмыс жасауына ықпал ету.

Әдістері:

Әңгімелесу, қатысушыларды өзіне жақын тарту

30 мин.

Негізгі бөлім: Кезеңнің негізгі мақсаты: «Bilim Media Group» компаниясының «Вilimland.kz», «twig-bilim.kz», «itest.kz» платформаларымен таныстыру.

Міндеттері: Аталған платформалардың ерекшеліктерін ажырата алу, мұғалімдерге тәжірибе жүзінде пайдалануды көрсету.

Мастер:

Құрметті тыңдаушылар, бүгін міне тағы бір сәті түсіп мен сіздермен «Bilim Media Group» компаниясының «Вilimland.kz», «twig-bilim.kz», «itest.kz» жаратылыстану және биология сабақтарында қалай пайдалануды жүзеге асыруға болатынымен бөліспекпін. Мен сіздерден барынша белсенді, өз ойларыңызбен бөлісулеріңізді қалаймын! Сабақты неғұрлым қызықты, әрбір оқушыға ұнамды етіп өткізу үшін, соғұрлым кең ауқымды ресурстарды пайдалуымыз қажет. Оқушыларды биология сабақтарында «Вilimland.kz», «twig-bilim.kz», «itest.kz» платформаларын пайдалануды үйретуге болатынымен танысайық.

Зейіндерін салады, диалогқа қатысады. Осы тақырып бойынша өздерінің не білетінімен бөліседі.

1 мин

Сергіту сәті

Тыңдаушыларға «Картоп егу» жаттығуын жасату

Жаттығу жасайды

30 мин

Негізгі бөлім:

Кезеңнің негізгі

мақсаты:

«Вilimland.kz», «twig-bilim.kz», «itest.kz» платформаларының құрылымдық картасымен таныстыру.

Міндеттері:

Сайттың мүмкіншілігі мен артықшылығын ашып көрсету

Мастер:

«BILIM MEDIA GROUP» компаниясының «Вilimland.kz», «twig-bilim.kz», «itest.kz» платформаларының құрылымдық картасымен таныстыру үшін әр платформаға жеке тоқталып өткен жөн болар.

«Вilimland.kz» платформасы жайлы ақпараттармен бөлісейін.

Вilimland.kz платформасының құрылымын түсіну үшін бірнеше бөлімге бөліп көрсеткім келіп отыр:

Тіл курстары (шет тілдері)

Мектепке дейінгі білім беру (мектепке дайындық, инклюзивті курстар)

Орта білім беру (мектеп пәндері, виртуалды зертхана, видеотоптама, аудиохрестоматиялар)

Кәсіптік білім беру (тау-кен кәсібі, құрылыс және ғимараттарды пайдалану)

twig-bilim.kz платформасының құрылымдық картасы келесідей:

Жаратылыстану пәндері (математика, биология, физика, химия, география)

Жер – ортақ үйіміз

itest.kz платформасын 2 бөлімге бөліп қарастыруға болады:

Міндетті пәндер;

Профильді пәндер

Енді Вilimland.kz платформасының артықшылықтарын атап өткім келіп тұр. ТАҢДА→ОҚЫ→ЖАҢҒЫРТ→БАҒАЛА үлгісіндегі оқыту түрі жаңаша болып келеді:

Мектеп бағдарламасы бойынша жасалған 10 000-ға жуық интерактивті сабаққа жол ашады;

Мұғалімдерге арналған көрнекі құрал;

3 тілде жұмыс істейді;

Жаратылыстану пәндері бойынша әлемдегі ең үздік виртуалды зертхананы пайдалануға мүмкіндік береді;

Кез-келген жерде өзіңізге ыңғайлы жерде және қолайлы уақытта қолдану мүмкіндігі бар;

Барлығына бірдей сапалы білім алуына жағдай жасайды.

twig-bilim.kz платформасының артықшылықтары:

Twig фильмдерін жасау барысында 9 кезеңнен тұратын процесті орындалады екен. Сөйтіп тыңдаушыларға таңдаған тілінде көруге мүмкіндік береді. Бұл өз кезегінде өте ыңғайлы платформа болып табылады.

itest.kz платформасы бітіруші сынып оқушыларына ҰБТ-ға дайындық ретінде таптырмас көмекші. Әр түрлі пәндер қамтылып, қатемен жұмыс жасауға мүмкіндік береді.

Бір сөзбен айтқанда, біздің қай пән болмасын, аталған ресурстарды пайдалану өз кезегінде өте тиімді әрі оқушыға қызықты етіп өткізуде оқулыққа балама көмекші. Бұл ресурстардың ауқымы өте кең және дәстүрлі оқыту тәжірибесін толықтыруға және кеңейтуге арналған дербес оқу кешені болып табылады. Ол әрдайым жаңарып және толықтырылып отырады.

Ресурстарды пайдалану сабақты бекітіп қана қоймай, оқушылардың тақырыпты толық меңгеруіне, сонымен қатар «миға сіңіруіне» септігін тигізеді. Себебі визуалды бейнелерді қабылдау алынған ақпараттарды жадыда тез әрі ұзақ уақытқа сақтауға көмектеседі. Ресурстарды пайдалану нейровизуалдандырудың қазіргі заманғы әдістемесіне жатқызуға болады. Оқу пирамидасына сүйенсек, аудио-визуалды қабылдау мен көрсетілім ақпараттарды 30%-ға дейін сақтайтынын көрсетеді. Яғни бұл дегеніміз жаңа тақырыпты меңгертуде оқушыларға визуалды көрсету, оның ішінде, тағы да жоғарыда аталған ресурстардың тиімділігін бірден-бір байқауға болады. Тіпті осы платформаларды мемлекеттік мекемелер қолдану үстінде. ҚР Білім және Ғылым Министрлігі, Ұлттық тестілеу орталығы, «Назарбаев зияткерлік мектептері» және «Өрлеу» Біліктілікті арттыру орталығы да қолдау білдіріп отыр.