Бүгінгі білім – ертеңгі байлығым тақырыбындағы ойындар

Сабақтың тақырыбы: Бүгінгі білім-ертеңгі байлығым!

Сабақтың мақсаты: Оқушылардың білімдерін, өнерлерін сайысқа түсіріп, білімді, жан-жақты болуға, өзіне деген сенімділік қасиеттерін қалыптастыруға бейімдеу, білуге, үйренуге деген қызығушылығын арттыру. Жарысуға, жарыста жеңімпаз болуға ұмтылуын дамыту, білімді, дарынды, озық болуға тәрбиелеу.

Жарыстың өту барысы:

1-жүргізуші:

Білімімен тәнті етер тектілер,

Мұратыңа білім қолды жеткізер

Бар ізгілік тек білімнен алынар,

Білімменен аспанға жол салынар

2-жүргізуші:

Армысыздар ата-аналар, ұстаздар!

Бармысыздар,

Бала қыран, жас шәкірт

Намыс туын жоғары ұстаңдар.

1-жүргізуші: Қазір сіздер осы уақытқа дейін алған білімімізді көрсететін, ән- жырмен өрнектелген «Бүгінгі білімім-ертеңгі байлығым» атты интеллектуалды ойынымызды тамашалайсыздар.

2-жүргізуші:

Ал, келіңдер, келіңдер,

Біріңе-бірің еріңдер.

Біліміңді тексеріп,

Ойын ойнап көріңдер.

1-жүргізуші: Осы аралақта алған білім дәрежемізді өлең-жыр, жұмбақ, мақал-мәтелмен өрнектеп, барымызды ортаға салайық. Біліміміздің артып, санамыздың өскенін, сөз байлығымыздың молайғанын көрсетейік.

2-жүргізуші:

Ашық-жарқын жүзді,

Әділқазылар біздің.

Тыңдап баға беруге,

Шақырайық төрге,

Төрелік өздеріңізде!

Оқушылар үш топқа бөлінген: «Өнер» тобы, «Зерек» тобы, «Батыр» тобы.

1-сайыс. Ұранымен тобымен таныстыру

«Зерек» тобының ұраны «Ана тілі –асыл нәрі бабамның».

Өнерімен өрге шығар білетіндер,

Сайыста білімдімен белдесіңдер.

«Батырлар», «Өнерлілер» қабыл алшы,

Сәлемін беріп тұрған «Зеректілер».

«Батыр» тобының ұраны «Ерлік –ел мұраты»

Батырлар танылады даңқыменен,

Батыр боп бабалардың салтыменен

Қарсылас командалар жеңе алады.

Білімпаз батырлықтың қалпымен.

«Өнер» тобының ұраны «Өнер алды қызыл тіл»

Құлақ салып тыңдап қал.

Өнер деген жұмбақ бар.

Шеттерінен қырағы команданың ұланы,

Өнерімен өрге өрлеп, биік шыңға шығады

2-сайыс. «Жүйелі сөз, жүйрік ой» атты шешендік сөздерден үзінді

Әйтеке жарып айтады,

Қазыбек қазып айтады,

Төле тауып айтады.

3-сайыс. «Мақал айтсаң, жол көрсеттің, мәтел айтсаң жанымды жайландырдың» демекші , енді келесі кезек еңбек, ана тілі, достық туралы мақал айту.

4-сайыс.

1-жүргізуші:

Ұлылардың ұрпағымыз кешегі,

Ой қалдырған, сөз қалдырған еселі.

«Сен білесің бе?» сайысы енді тосады,

Тұрақты тіркес мағынасын ашады

Тұрақты сөз мағынасын ашу

Тілдің ұшында тұр. (ұмыту, жеткізе алмау)

Қас пен көздің арасында –(лезде, тез, жылдам)

Апама жездем сай-(мінезі сай)

Ағаштан түйін түйген-(шебер)