Дін және білімнің қоғамдағы маңызы 11 сынып

Қазақстандағы мешіт пен мектеп құрылысы төңірегіндегі пікірталас: қоғам бірлігі мен болашақтың таразысы

Соңғы жылдары Қазақстанда мешіттер мен мектептердің салына бастауына қатысты қоғамда түрлі пікірлер мен көзқарастардың жиілеп, тіпті қайшылыққа ұласып жатқанын байқауға болады. Бір тарап жастардың болашағы – білім мен ғылымда деп есептеп, мектептер мен оқу орындарын көптеп салып, білім сапасын көтеруді басты бағыт ретінде көреді. Екінші тарап – Қазақстан халқының басым бөлігі мұсылман болғандықтан, діни құндылықтар мен тәрбиеге басымдық беріп, мешіттер мен діни білім беру мекемелерінің санын көбейту қажет деген ұстанымда.

Бұл екі бағыттың да өзіндік негізі мен дәлелі бар. Бірі – ғылым мен технологияның дамуын алға тартып, елдің өркендеуі үшін жастардың жан-жақты білім алуын дұрыс десе, екіншісі – рухани құндылықтарсыз қоғам азып-тозады деп санайды. Алайда түйткіл – қай тараптың «жеңуі» немесе өз көзқарасын басым етуінде емес. Негізгі мәселе – бұл пікірталастардың халықтың ортақ мүддесі мен болашағынан алыстап, әркімнің жеке сенім мен түсінігін жоғары қоюы арқылы қоғам ішінде жік туындауында.

Қазақстан – зайырлы мемлекет. Бұл дегеніміз – мемлекет діннен бөлек, бірақ дінге қарсы емес. Сол себепті мешіттер де, мектептер де салынуы керек. Бірі – адамзаттың рухани болмысын тәрбиелесе, екіншісі – ақыл-ой мен парасатты қалыптастырады. Екеуі де қатар дамыса, тепе-теңдік сақталады.

Егер мемлекет экономикалық, әлеуметтік тұрғыда қуатты болмаса, білім беру де, дін де өз жемісін толық бере алмайды. Халықтың тұрмыс жағдайы түзелмейінше, қоғам ішіндегі кикілжіңдер, пікір қайшылықтары тереңдей түседі. Сондықтан ең басты міндет – мемлекетті нығайту, халықтың әл-ауқатын жақсарту, сапалы білім мен әділетті рухани тәрбиеге бірдей көңіл бөлу.

Болашақ – тек біліммен немесе тек дінмен емес, осы екеуін үйлесімді ұштастырып, қоғамда өзара түсіністік пен бірлікті сақтауда жатыр. Ұлт болашағы үшін ең құнды нәрсе – татулық пен парасаттылық.