Достаса білеміз ашық сабағы мектепке дейінгі балаларға

Ақтөбе қаласы

№22 «Балдырған»МДҰ

Ақшолақова Ж.Е.- психологі.

Тақырыбы: « Достаса білеміз!»

Мақсаты : Достар туралы ұғымдарын кеңейту.Достарға деген жақсы қарым-қатынас дағдыларын қалыптастыру.Достықты қадірлей білу жөнінде түсініктерін дамыту.Адамдарға деген сенім мен өзара түсіністікке тәрбиелеу.

Әдістері: әңгіме,сұхбат,түсіндіру,оқу,ойын.

Балалар, қоршағандардың бәрімен мейірім шашатын сөздермен сәлемдесейік:

Армысың Алтын Күн!

Армысың Жер Ана!

Армысың, Достарым!

Сендерді көрсем қуанам!

Шаттық шеңбері: -Амансыңдар ма достарым! Достық деген тамаша сөз,жүрекке сондай жылы.Достар деген бір-бірін жақсы түсінетін,бірге жүргенді ұнататын адамдар.Топтағы бар бала бір-бірлеріңмен доссыңдар ма? Мен де сенің достарыңмын. Бір-бірімізді көңілді әрі қуанышпен қарсы алу үшін мен сендерді шаттық шеңберіне шақырамын.Өйткені біздің шеңберімізге әрқашанда нағыз шынайы достар жиналады.Бір-бірлеріңе қолдарыңды созып,шын жүректен мынадай сөздермен сәлемдесіңдер: «Сәлем Айым! Мен сенің досыңмын!».

-Адамдар бір-біріне жылы сөз айтқанда айналаның бәрі ерекше жарқырай түседі. Жарайсыңдар, бір-бірлеріңе айтқан тілектерің қандай әдемі!Достар әрқашан бір-біріне жақсылық тілейді,көмектесуге асығады,бірге ойнайды.

-Ал қазір сендерге екі дос туралы әңгіме оқып берейін. Әңгіменің аты «Қызғаныштың кесірі» деп аталады.

Назымға анасы секіретін жіп алып береген еді. Ол күні бойы аулада жіпті айналдырды.Біресе бір аяқтап,біресе екі аяқтап секірген ол,өзін цирктің әртісіндей сезінді.

Жанына көрші тұратын құрбысы Шынар келіп,біраз қызықтап қарап тұрды да:

-Екеуіміз кезек-кезек секірейік.Жібіңді маған да бере тұр,-деді.

-Бұл менің жібім,өзіңдікін әкел де секіре бер ...-деді Назым тыржиып.

Досына ренжіген Шынар әрірек барып,орындықта біраз отырды.

Назым жалғыз өзі секіре-секіре әбден шаршады.Біраз уақыттан кейін жібін жинап алды да,қабағын түйіп,үйіне келді.Манадан бері ашық терезеден анасы қызының қимылын бағып тұрған болатын:

-Қызым,саған не болды?-деді анасы.

-Білмеймін... Маған көңілсіз,-деді Назым.

-Шынар екеуің бірігіп ойнағанда,көңілсіз болмайтын еді,-деді анасы жай ғана.

Бұл сөзден кейін Назым есік алдына жүгіріп шықты.

Бірақ маңайда Шынар көрінбеді.

-Шынар Назымға не үшін ренжіді?Назым не істеді?Анасы Назымға қандай ақыл айтты?Кешірім сұрау үшін қандай сөздер айту керек?

-Қазір мен сендерді «Біз доспыз, өйткені...» ойынын ойнауға шақырамын.Менің қолымда доп бар, бір-бірімізге бере отырып сөйлемді аяқтап айтамыз.