Достық сезім сабақ жоспары мектепке дейінгі балаларға

Өзін-өзі сабағы: «Достық сезім»

Мақсаты: Балаларға достық, өзара сыйластық, сүйіспеншілік туралы түсінік беру, бір-бірімен тату болуға үйрету. Баланың өзін-өзі тануына, достарын бағалауға, құрметтеуге, ренжітпеуге, досының айтқанын соңына дейін тыңдауға тәрбиелеу, есте сақтау қабілетін дамыту.

Көрнекілігі: Кішкене жүрекшелер, достық ағашы.

Әдіс-тәсілдері: түсіндіру, әңгімелесу, сұрақ-жауап, ойын, шығармашылық тапсырмалар. Сабақтың жүру барысы: 1.Ұйымдастыру бөлімі. «Сәлемдесу», «Шаттық шеңбері» 2.Дос туралы түсінік беру. 3. «Қарлығаш пен Дәуіт» ертегісін көрсету (құстардың дауысы). 4.Сұрақ-жауап. 5.Дос турлы мақал, тақпақ айту. 6.Күтпеген сәт «Жүректің келуі» 7.Ойын: «Досымның жүрегі» («Біз тәртіпті баламыз» әнімен) 8.Қорытынды «Достық деген не?» 9.Жүректен-жүрекке. Ән айту «Ризамыз бүгінге»

Тәрбиеші: -Бүгін біз өзін-өзі тану сабағымызды осы әдемі де кең, әрі жарық бөлмеде өткіземіз. Мен сендерді көргеніме қуаныштымын. Мен сендермен шын жүректен мынадай сөздермен амандасқым келіп тұр. Ән салуға барамыз (шеңбер бойымен жүру) Досымызды табамыз (тоқтайды) Сәлемет пе! Міне мен! (қолдарын екі жаққа жаю) Доспын енді сенімен (бір-бірімен қол алысу) Енді балалар, қонақтармен амандасамыз.

Үлкенге де – сіз, Кішіге де – сіз, Қонақтарға құрметпен Бас иеміз біз. Сәлеметсіздер ме, қонақтар» - Балалар біз амандасаиық, енді шаттық шеңберіне шақырамын.

Біз балдырған тең басқан, Дос құшағын елге ашқан. Мықты болсын іргеміз, Бәріміз де біргеміз.

- Рахмет, балалар! Орнымызға отырайық.

Балалар, бүгінгі сабағымыздың тақырыбы «Достық сезім» деп аталады, яғни «достық», «дос» туралы әңгімелейміз. Дос, достық дегеніміз – адамдар арасындағы жақсы қарым-қатынас, бір – біріне деген сүйіспеншілік, жанашырлық сезім. Достар бір-бірін режітпейді, нағыз достар бір-бірін құрметтейді, сыйлайды, кешірімді болады.

Достық сезім тек қана адамдар арасында ғана емес, ел мен елдің арасында да болады. Мысалы: біздің Қазақстан Республикасы басқа мемлекеттермен, басқа елдермен жақсы достық қарым-қатынаста. Соның арқасында біздің еліміз дамып келеді.

Балалар, егер сендер бір-біріңді ренжітпей, тату-тәтті ойнасаңдар, бір-біріңе сыйлы боласыңдар, соның арқасында сендерде де достық сезім пайда болады. Достықтың арқасында қиыншылықтардан құтылуға болады. Достық туралы көптеген өлең әңгіме, ертегілер бар. Қазір біз сендермен «Қарлығаш пен дәуіт» ертегісін ойнап көрсетейік.

«Қарлығаш пен дәуіт» ертегісі

Қарлығаш жардың қуысына ұя салып, балапан шығарыпты. Анасы азық әкелуге кеткенде, балапандары шыдамсыздана күтумен болады екен. Бір күні қарлығаштың ұясына жылан өрмелеп бара жатады. Мұны көрген қарлығаш шыр-шыр етіп, балапандарына арашашы іздейді. Ұшып көкекке барады. Қарлығаш: «Көкек, маған көмек бере гөр, балапандарымды жылан жейін деп жатыр!» Көкек: «Бүркіт қонаққа шақырып еді, уақытым жоқ» Қарлығаш ұшып қарғаға келеді. – Қарғажан, маған көмек бере гөр. Балапандарымды жылан жегелі жатыр. Қарға қарлығашқа бұрылып қарамастан: Мен үйленейін деп жатырмын, мазамды алма! Қарлығаштың амалы таусылып, шырылдап ұшып келеді. Қарлығаш дәуітке .- Улы жылан балапандарымды жұтпақшы болып, ұяма өрмелеп барады. Дәуіт: Олай болса, мені тезірек жеткіз, Қарлығаш қанатын тосады. Қарлығаш пен дәуіт көзді ашып- жұмғанша ұяға жетеді. Дәуіт ұяға жетіп қалған жыланға тап береді. Жылан сылқ етіп жерге құлап түседі. Дәуіттің ерлігіне сүйсінген қарлығаш онымен айнымас дос болады. Содан бері талай заман өтсе де, қарлығаш пен дәуіт бір ұяда тұрып, бірге өмір сүретін болған екен.

Ал, енді балалар, бұл ертегінің кейіпкерлері бір-біріне дос болса қалай болар екенін көрейікші!