Ел боламын десең, бесігіңді түзе қойылымы

Көрініс тақырыбы: «Ел боламын десең, бесігіңді түзе»

Мақсатымыз : Қазақстан Республикасының 25 жылдығына орай оқушыларды тәуелсіз еліміздің қорғаны болуына патриоттық сезімдерін ояту, отансүйгіштік пен эстетикалық тәрбие беру, түрлі ұлттар арасындағы достастықты нығайту,қазақ халқының ұмыт болып бара жатқан дәстүрлерін бойына сіңіре білуге тәрбиелеу.

Күтілетін нәтиже:

Оқушылар салт дәстүрден хабардар болады.

Патриоттық сезімі оянады.

Түрлі ұлт өкілдері арасындағы достастықты нығайтады.

Өзге ұлт өкілдеріне қазақтың салт дәстүрлерін сіңіреді .

Өз рөлдерін сомдау арқылы кейіпкердің кейіпіне енеді.

Автор: Әскерге аттанатын Азаматтың үйінде бүгін абыр-сабыр.Себебі, бүгін Отан алдындағы борышын өтеу үшін, Азамат алғаш рет үйінен жыраққа аттанбақ. Азаматтың әжесі қазақтың салт-дәстүрлерін қашан да сақтап, ұстанған кісі. Сол себепті немересін әскерге тоқымқағар дәстүрімен шығарып салады.

Дастарқан басына туған-туыс, жора-жолдас түгел жиналды.

Сахнада келіндер ары- бері керсен көтеріп,дастарқан жайып жүреді.

Анасы Аяулым:

Ал, бүгін бастарыңызды қосып отырған себебіміз, осы үйдің тірегі болған менің қуанышым немерем, баламның жалғыз тұяғы әскерге аттанбақ.Отан алдындағы борышын адал атқарып,елге аман-есен оралсын,бауырларына қорған болсын, әкесінің көрмей кеткен қызығын көріп, артқан сенімін ақтасын.Әкесі тірі болса осы қуанышын көрер еді ғой( бәрі мұңайып, бір сәт көздеріне жас үйіріледі.)

Сол сәтті пайдаланып Айсұлу жеңешесі:

Қой, мұңаймаңыз, «Ат тұяғын тай басар» демекші міне, ұлыңыз ер жетіп, қолқанатыңызға айналды.Осы балаңыздың арқасында егініңіз бітік шығып,бәрімізге кеусен тараттыңыз.

Кіші немересі Рамазан:

Жеңеше, кеусен таратқан дегенді қалай түсінеміз.

Айсұлу жеңеше:

-Әй балаларым-ай, бұл біздің егін бітік шыққандағы тарататын дәстүріміз ғой.

Көрші баласы Руслан:

-Әй жеңеше, сіздің де таппайтыныңыз жоқ осы.

Автор: Сол сәтте үйге біраздан бері келмеген ұзақтағы нағашысы әпкесіне соғымнан сыбаға алып кіріп келеді.

Азамат орнынан тұрып, құшақ жайып, амандасады. Амандық-саулық сұрасқаннан кейін нағашысы Мейрамбек таңданып:

Мейрамбек:

Бәрекелді, жиен көптен көріспеген едік, үлкен жігіт болыпсың, әкеңнен айнымай қалыпсың, жарайсың,өркенің өссін! Байқаймын жиен сырттағы көлікті алғасын -ау шамасы.

Айсұлу жеңеше: Нағашысы естімеген екен ғой, олай болса, «Үйдің жақсы болуы - ағашынан, Жігіттің жақсы болуы – нағашыдан» демекші нағашысынан байғазы сұрайын.

Нағашасы Мейрамбек :

«Жиен мыңнан үлкен, Күйеу жүзден үлкен» деп нағашысы жиені мен жеңешесіне байғазысын береді.