Ел жүрегі Нұр-Сұлтан тақырыбындағы эссе материалы

Ел жүрегі-Нұр-Сұлтан

Нұр-Сұлтан – Қазақ елі болашағының қаласы. Мәдениеттің ошағы, ғылым мен білімнің ордасы.Еліміздің көгілдір туы желбіреген тәуелсіздігіміздің ордасы. Қазақстан халқы бірауыздылықпен, татулықпен, достықпен өзге елдерге үлгі боларлықтай қажыр-қайратын танытты.

Нұр-Сұлтан күн өткен сайын құлпырып, өзінің рухани келбетін жаңартып, жыл сайын ажарлана түсуде. Нұр-Сұлтан бүгінгі күні ғылымы мен білімі қарқынды дамып, жаңа бағытта көркейіп, гүлденуде. Қазір Нұр-Сұлтан өзінің қонақтарын қала бет-бедерінің әсемдігімен және архитектуралық шешімдерінің батылдығымен, тұрғындарының жылы шырайлылығымен және қонақжайлығымен таңғалдырады. Жаңа әрі озық үлгідегі тамаша тұрғын-үй кешендері, еңселі әкімшілік ғимараттары, гүлзарлары мен су бұрқақтары, әсем монументтері мен сәулет ескерткіштері бар Есіл жағасындағы еңселі қала бейне бір қауыз жарып келе жатқан көп гүлді, мол жапырақты өсімдік тәрізді– тек біздің ғана емес, дүние жүзіне зиялылық нұрын төгетін тоғыз жолдың торабындағы Еуразияның, әлемнің сәулетті қаласына айналып отырған ғажайып шаһар.Кезінде«осындай қиын шақта қазаққа жаңа астананың керегі қанша?» деп кері тартқандар бүгінде төмен қарайды. Өйткені, жыл өткен сайын Нұр-Сұлтан құлпырып, қазіргі кезде көз тойғысыз келбетте.Келешегі– кемел, ертеңі – нұрлы Қазақстан мемлекетінің әлемдік аренадағы абыройы да, ары, беделі де, бағы – Нұр-Сұлтан. Нұр-Сұлтан – Еуразия жүрегі. Кәрі құрлықтың тамырына қан жүгірткен жүрегі мәңгілік соғуын тоқтатпаса екен

Өзге халықтардың көпшілігі тоқырауға ұшырап жатқанда, жаңа заманға жасампаздықпен қадам басып келе жатырған еліміздің жүрегі – Нұр-Сұлтан таңдаған сара жолынан жаңылмастан мақсатына әр қадамын басқан сайын жақындай түсуде. Елбасымыздың «Нұр-Сұлтан – Отанымыздың жүрегі, тәуелсіздігіміздің тірегі» деген сөзімен ойымды түйіндей келе еліміздің жүрегі әрқашан соғуын тоқтатпай, көркейіп, гүлденіп, еңбекқорлығы мен жасампаздығымен әлемді таңғалдырудан талмай, «Мәңгілік ел» екендігін дәлелдесе екен.