Электромагниттік өрістердің бала денсаулығына әсері туралы мақала

Ерте жастағы балаларға ұялы телефонның зияны

Электромагниттік өрістер барлық тіршілік көздеріне, әсіресе, адам ағзасына өте үлкен зардап тигізеді, биологиялық - медициналық зерттеу нәтижелері дәлелдеп көрсеткендей, электромагниттік өрістердің адамның нерв жүйесіне, ішкі мүшелеріне, физиологиялық дамуына тигізетін теріс зардаптары анықталған. Соның ішінде, электромагниттік өрістер баланың ми құрылысына өте қатты әсер ете отырып, дұрыс ойлау, есте сақтау қасиеттерін бірден бұзады. Ерте жастағы балалардың жүйке талшықтары өсіп-жетілу кезеңінде болғандықтан, радияциялық сәуледен жылдам зиян шегеді. Көп жағдайда жетіліп келе жатқан бала ағзасының радиациялық сәулелерге қорғанысы әлсіз екенін ескере бермейді. Қазіргі таңда ата-аналар баланы тыныштандыру мақсатында жас ерекшелігін ескерместен, ұялы телефон, смартфон сияқты электронды құрылғыларды шектен тыс пайдалануға береді. Баланың жас ерекшелігіне назар аудару керектігін ескере бермейді.

Бұл оның психикалық дамуына зақым келтіреді. Себебі баланың ой-санасы тұрақсыз, әлі дамып, қалпына келіп жатқан кезеңнен өтеді. Ол кезде бала қолдың сезімтал моторикасына, танымдық жүйесіне қатысты ойындарға қатысуы тиіс. Денесі көп қозғалып, бұлшықеттері де, физикалық ойындар арқылы дамуы керек. Ерте жастағы балалар таза ауада көп серуендеп қимылдауы тиіс. Ал бала кішкентай кезінен бастап ұялы телефонмен ойнаса, бір орыннан қозғалмайды. Соның салдарынан арқаның қисаюы, көз жанарының нашарлауы, сөйлеу тілінің тежелуі, психикалық дамуының тежелісі, ашушаңдық, семіздік, ми қызметінің бұзылысы, тіпті психикалық ауытқуы тағы да басқа аурулар табуы мүмкін. Кішкентай ғана құрылғының бала ағзасына тигізер кері әсері, зиянын ары қарай тізе беруге болады.

Ұялы телефонмен көп әуестенген балардың мінез-құлқы өзгереді,эмоционалды тұрақсыздық пайда болады. Яғни, ашуланып, тез ренжіп, айқайлап та кетуі мүмкін. Телефонмен отырған баланың біртіндеп ұялы телефонға тәуелді болып кететінін ата-аналар көп жағдайда сезбей қалады. Одан кейін ол баланы ұялы телефонға тәуелділіктен айыру өте қиынға соғады. Өз эмоциясын басқара алмай, рухани құндылықтар орнына, қарапайым қажеттіліктерге талпынады, себебі баланың ұялы телефонға тәуелділігі, қызығушылығы артады. Оған қоса түрлі-түсті экран, жылдам өзгеріп тұратын суреттер психикалық қабылдауды тездетеді. Бала оның пайдасы мен зиянын ажырата алмайды. Телефон арқылы көрген түрлі зорлық-зомбылық іс-әрекеттері бейнеленген ойындар, мультфильмдер, қорқынышты кадрлар…