Еңселі елорда туралы танымдық мақала материалы

Еңселі Елорда

Еліміздің еңселі елордасы – Нұр Сұлтан қаласы. Аты затына лайық елордамыз бүгінде талай жұртты тамсандырған, сәні мен салтанаты жарасқан жастар қаласы. Арман қуып келген әр жас өзіне лайықты орын табатын бұл құтты мекен күннен күнге көркейіп келеді.

Еңселі елордамыздың тарихы да тереңде жатыр. Елбасымыз Нұрсұлтан Әбішұлының көреген саясатының арқасында 1994 жылы 6 шілдеде астанамызды Алматы қаласынан Ақмолаға ауыстыру туралы шешім қабылданды. Кейінрек, 1997 жылы 6 мамырда Ақмола атауы ресми түрде Астана деп ауыстырылды. Осылайша салтанатты түрде қала ашылуы 1998 жылы 10 маусымда өткен болатын. Мұндай көркем қалана тек Қазақстандықтар ғана емес, күллі әлем елдері тамсана тамашалап, оған 1999 жылы ЮНЕСКО-ның шешімімен «әлем қаласы» деген атақ берілді. Осындай марапаттың негізінде Елордамыз 2000 жылы әлем Астаналары мен ірі қалалардың Халықаралық Ассамблеясына мүшелік ете бастады. Сан жылдар бойы өзіндегі керемет ескерткіштер, зәулім ғимараттар мен тарихи кешендердің бой көтеру нәтижесінде астанамыз төркүл дүниеге мәшһүр болды. Тұңғыш президентіміздің құрметіне бүгінде астанамыз «Нұр-Сұлтан» қаласы деп аталады.

Бас қаланың басты сиволы Бәйтерек болып есептеледі. Мұнан өзге де сәулеті мен дәулеті келіскен «Хан шатыр», «Бейбітшілік және келісім сарайы», Орталық Азиядағы ең ірі мешіт – «Әзірет Сұлтан» мешіті, «Қазақстан» орталық концерт залы, «Қазақ елі» монументі мен «Думан» ойын-сауық орталығы, «Астана опера және балет театры» сынды қала көркін кіргізіп тұрған сәулет туындылары мен керемет кешендерді ауыз толтырып атап өте аламыз.

Елордамызға келген әрбір адам оның көркі мен керемет келіскен келбетіне тамсана алмасқа шарасы жоқ. Әрбір қонағын ыстық ықыласпен құшақ жая қарсы алатын ертегідей Елордамыздың ертеңі де еселі, келешегі кемел болатынына кәміл сенеміз. Еңселі Елордамыз мәңі жасасын!

Абылай хан атындағы

Қазақ Халықаралық Қатынастар

және Әлем Тілдер Университеті

журналистика мамандығы

2-курс студенті

Қамбар Бейбітхан.