Гендерлік теңдік туралы эссе 11-сынып оқушыларына

«Гендерлік теңдік: ерлер мен әйелдердің құқығы тең болу қажет пе?»

Қазіргі заман – адам құқығы, әділеттілік пен теңдік құндылықтары негізінде дамып келе жатқан кезең.Осы тұрғыда гендерлік теңдік – ерлер мен әйелдердің барлық салада тең құқылы болуы – бүгінгі қоғам үшін аса маңызды. Бұл тек ұран емес, бұл -әрбір адамның бақытты, қауіпсіз, толыққанды өмір сүруінің кепілі. Әйелдер де ерлер секілді шешім қабылдауға, қоғамда өз орнын табуға лайық. Дегенмен, бұл құқықтар қағаз жүзінде көрінгенімен, өмірде әйелдер әлі де түрлі әділетсіздікке ұшырап жатады.

Қазақ тарихына үңілсек, әйелдің әлсіз жаратылыс емес, ержүрек, ақылды, қайсар тұлға екенін дәлелдейтін батыр қыздарымыз көп болған. Мәселен, сақ патшайымы Томирис– елін сыртқы жаудан қорғап, өз халқының еркіндігін сақтап қалған дана әрі батыр тұлға. Ұлы Отан соғысы жылдарындағы Әлия Молдағұлова мен Мәншүк Мәметова – ерлермен қатар майдан шебінде шайқасқан қаһармандар. Олар нәзіктігімен қатар мықтылығын көрсетті. Бұл әйелдер – рухы биік, жүрегі кең, батылдығы шексіз жандар екенін дәлелдеді. Қазіргі таңда да ғылым, саясат, медицина, спорт сияқты салаларда ел намысын қорғап жүрген әйелдер аз емес.

Алайда осындай мысалдарға қарамастан, қоғамда әйелдерге қатысты теңсіздік пен зорлық-зомбылық мәселесі өзекті болып қала беруде. Тұрмыстық зорлық-зомбылық –көптеген әйелдің өмірін көлеңкелейтін ауыр шындық. Физикалық, психологиялық, экономикалық және жыныстық қысым – кейбір отбасыларда қалыпты құбылысқа айналған. Өкінішке қарай, бұл жағдайлар көбіне ер адамдар тарапынан жасалады. Көптеген әйелдер қорқып, үнсіз қалады, себебі оларды тыңдайтын, қорғайтын орта болмауы мүмкін. Зорлықтың құрбаны болған әйелдерге қолдау көрсету, оларға сенім арту, олардың даусын есту – бүкіл қоғамның міндеті. Әйел үнсіз қалса, бұл оның әлсіздігін емес, оны ешкім қорғамағанын білдіреді.

Қорытындылай келе, гендерлік теңдікке жету үшін қоғамда бұрыннан қалыптасқан қағидаларды жою, әйелдер мен ерлерге бірдей мүмкіндік беру, әр адамды жеке тұлға ретінде құрметтеу қажет. Теңдік – бұл ер мен әйелдің жарысы емес, оларды қатар қою.Әйелдерге жасалған әділет – қоғамға жасалған әділет. Ал әділет бар жерде даму бар,тұрақтылық бар, болашаққа сенім бар.