Грантқа лайық болу туралы мақала 11 сынып

Неге мен дәл грантқа лайықпын?

«Армансыз адам – қанатсыз құспен тең» дейді халқымыз. Бұл өмірге келген әр адамзаттың өзіне тиесілі миссиясы бар. Сол миссияны орындау – біздің өмірлік борышымыз.

Арман – мақсаттан туады, ал мақсат – әрекетке айналғанда ғана орындалады. Мен де осы жолда аянбай еңбек етіп, маңдай термен мақсатқа жеткім келеді. Журналистика – менің жүрек қалауым, өмірлік жолым. Осы салада үлкенге үлгі, кішіге өнеге бола білетін тұлға болуды армандаймын. Осы арманымның орындалуына бірден-бір мүмкіндік сыйлайтын – грант.

Грант – өз арманыңа жақындататын бір қадам. Бұл – шексіз мүмкіндіктер әлеміне апарар жол. Арманын ешкімге қиғысы келмейтін адам оған жетпей тынбайды. Мен өзімді шығармашыл, табанды, мақсатынан айнымайтын қайсар қыз ретінде көремін. Бұл қасиеттер мені болашақта еліміздің алдыңғы қатарлы журналистерінің бірі болуға жетелейді деп сенемін. Сондықтан мен грантқа лайықпын деп есептеймін.

Алайда өз арманыңды тек грантпен байланыстыру – қате. Грант – армандаған есігіңді ашатын кілт болса да, әр нәрсенің тағдыры мен бұйырғаны бар екенін ұмытпаған жөн.

Қорытындылай келе, өміріміздің бастау алар шағында өзіміз үшін жанымызды салуға дайын болуымыз қажет. Бүгінгі еңбегіміз – ертеңгі күннің үлкен мүмкіндіктері.

Бисенбай Ақбота Батырбекқызы