Кітап – жан байлығы туралы мақала, мектептен тыс мекемелерге

Кітап - жан байлығы

Адамзаттың жан дүниесін байытатын — кітап. Кітап — байлық, кітап — тарих. Сонау ғасырлар бойы келе жатқан оқиғаларды бізге жеткізуші де кітап. Біріне дос болса, енді біріне рухани азық. Адамның рухани дамуына, ойшыл болуына септігін тигізеді. Болашаққа бағдар болатын кітап десек те қателеспейміз. Кітап — адамзат қазынасы екенін түсінуіміз керек.

XIX ғасырда кітап адамзатты оятқан. Сол заманда қандай оқиға болса да, ақын-жазушыларымыз қолына қалам алып, қағаз бетіне түсірген. Міне, сол шығармалары бүгінгі күнге жетіп отыр.

Қазіргі қазақ қоғамындағы рухани ахуал өте қиын. Себебі кітап оқымаймыз, тіпті оқығымыз да келмейді. Ал оқу жоқ жерде өсу, даму жоқ. «Кітап — білім бұлағы, білім — өмір шырағы» деп бекер айтылмаған. Кітаптан алған білім үлкен белестерге жетелейді. Кітап — барша ғылым-технологияның атасы болғандықтан, онсыз өмірді елестету мүмкін емес. Ғасырлар бойы келе жатқан кітаптың жойылуына жол жоқ.

Кітап оқитындар санының азаюына ғаламтор мен жаңа заман технологиясынан кінәрат іздейміз. Кінә — оларда емес, өзімізде. Кітап оқу үшін кітапханаға барудың қажеті шамалы, электронды түрде оқуға да болады. Кітаптың жойылуына мүмкіндік жасап отырған өзіміз, яғни адамдар. Кітап оқимын деген адамға мүмкіндік өте көп.

Көзімізді ашып қарасақ, кітапханашы мамандығына құштар мектеп түлектері санаулы. Ол мамандықты оқып шыққанымен, жұмыс істеу ойлары да бола бермейді. Кітаптың жойылуы кішкентай нәрселерден басталады. Мысалы, үйіңізде кітап бар болса да, оны оқымауыңыз. Бұрынғыдай кітапқа арналған сөрелері бар үйлер санаулы. Міне, осының өзі-ақ кітаптың құнсыздануының дәлелі.

Еліміздің болашағы — өсіп келе жатқан ұрпақ дейміз. Сол ұрпақтың кітапқа деген қызығушылығын арттыру жолдары өте көп. Ғылым-біліммен жарысатын заманда артта қалып кетпеу үшін жан дүниемізді кітаппен байытқанымыз жөн. Сондықтан ұлтты ойласақ, кітап оқыту тетіктерін іске қосуымыз қажет деп ойлаймын.

Кітап — біз үшін білім, мәдениет, ғылым, әдебиет көзі. Кітап — болашағымыздың кілті. Онсыз өсу жоқ. Ал өсу болмаған жерде, дамыған елдердің қатарына кіру арман болып қалмақ. Сондықтан қазірден бастап ойлануымыз керек.