Креативтілік технология және жасанды интеллект білімде

Креативтілік пен технология тоғысындағы білім: жасанды интеллект білім беру үдерісінде

Астана қ., Назарбаев Зияткерлік мектебі

Касенова Айгуль Мухтаровна, Омарова Клара Серикбаевна

орыс тілі мен әдебиеті пәні мұғалімдері

Сагинган Назерке Бериккызы, Мухамеджанова Айгерим Кайратовна, Хусаинова Роза Амирбековна

қазақ тілі мен әдебиеті пәні мұғалімдері

Тақырыптың өзектілігі

Қазіргі білім беру үдерісі тек теориялық біліммен шектелмей, креативтілік пен технологияны біріктіру арқылы оқушыны жан-жақты дамытуға бағытталуда. Жасанды интеллект құралдарының қолжетімді әрі тиімді болуы мұғалім мен оқушы үшін жаңа мүмкіндіктер ашады. Осындай жаңа бағыттардың бірі – пәнаралық оқу жобасы арқылы тіл, мәдениет және технологияны ықпалдастыру. Бұл компонент білім берудің жаңа парадигмасын қалыптастыруда маңызды қадам болып саналады және заманауи оқушыны шығармашыл, ойлы әрі технологияны меңгерген тұлға ретінде тәрбиелеуге ықпал етеді.

Аңдатпа (аннотация)

Бұл мақалада қазақ және орыс тілі пәндері аясында жүзеге асқан пәнаралық жоба талданады. Жобаның мақсаты – жасанды интеллект құралдарын пайдалана отырып, оқушылардың тілдік, мәдени және технологиялық дағдыларын дамыту. Мақалада оқушылардың мотивациялық видео үндеу жасау арқылы танымал тұлғалардың бейнесін сомдауы, креативті ойлау мен бірлескен жұмыс тәжірибесі баяндалады. Сонымен қатар, жоба аясында туындаған қиындықтар мен жетістіктер, оқушылар мен мұғалімдердің пікірлері келтіріледі. Бұл тәжірибе тіл мен технологияны ұштастырып, оқушылардың заманауи білім кеңістігіндегі орнын айқындай түсті.

Тірек сөздер: пәнаралық жоба, жасанды интеллект, тілдік білім, технология, креативтілік

Білім беру саласы соңғы жылдары үлкен өзгерістерді бастан өткеріп жатыр. Бұрынғыдай тек пәндік біліммен шектелу жеткіліксіз екенін уақыттың өзі дәлелдеп отыр. Қазіргі оқушыға теориядан бөлек – практикалық дағды, технологиямен жұмыс істей білу, сыни және креативті ойлау қабілеті қажет. Осындай кешенді дағдыларды дамыту мақсатында Назарбаев Зияткерлік мектебінде ұйымдастырылған қазақ тілі мен орыс тілі пәндері біріккен пәнаралық юнит – заман талабына сай келетін жаңашыл жобалардың бірі болды.

Компонент қазақ және орыс тілі пәндерінің аясында жүзеге асып, оқушылардың тіл мен мәдениетті зерттеуін жаңа қырынан қарастыруға бағытталды. Мақсат – жасанды интеллект құралдарын пайдалана отырып, танымал тұлғаның атынан қазақ жастарына арналған мотивациялық видео үндеу жасау. Бұл жұмыстың ерекшелігі – тілдік және мәдени контекстіні технологиямен байланыстыра отырып, оқушылардың өзара ынтымақта жұмыс істеуі мен шығармашылық қабілетін дамыту.

Компоненттің құрылымы үш кезеңге бөлінді: дайындық, негізгі және қорытынды. Әр кезеңде оқушылар зерттеу жүргізіп, мәтін жазып, сценарий құрастырып, видео дайындау жұмыстарын атқарды. Оқушылар өз кумирі ретінде түрлі танымал тұлғаларды – өнер, спорт, ғылым, технология саласындағы өкілдерді таңдады. Олар өз кейіпкерінің өмір жолын, шығармашылығын, қоғамға әсерін зерттеп, «егер ол Қазақстанға келсе, не айтар еді?» деген ой төңірегінде мотивациялық мәтін жазды. Кейіпкердің сөйлеу мәнері, стилі, ойлау формасы сақталып, жасанды интеллект көмегімен оның бейнесі мен дауысы біріктірілді.