Мамандық жайлы ой толғау жас мамандарға арналған мақала

Мамандық жайлы ой толғау

(эссе)

Мен жас маманмын! Мен болашақ шебер ұстазбын! Ұстаз болу менің бала күнгі арманым!

Әлі есімде отырғаным партаға,

Таңдана кеп үңілгенім картаға

Жайдары, ашық, мұғалима жас қыздың,

Түзу отыр деп қаққаны арқаға – деп ақын жырлағандай «болашақта кім болам?» деген қиялыма қанат бітірген бастауыш сынып мұғалімім Толқын Түтінқызы еді.

Арманыма қол жеткізу мақсатында Ілияс Жансүгіров атындағы Жетісу мемлекеттік университетінің екі шет тілі факультетін тәмамдап, бүгінгі күні ағылшын тілі мұғалімімін.

«Ең әуелі мектепке керегі – білімді, жақсы оқыта білетін мұғалім» – деп Ахмет Байтұрсынов айтқандай «жақсы мұғалім» болу менің өмірлік кредом!

«Жақсы мұғалім» болуым үшін – көп іздену, көп оқу, жаңалықтан қолүзбеу, шығармашалаққа ұмтылу – менің педагогикалық ұстанымым айналды.

Бүгінгі таңда білім беру саласы күнделікті жаңалықпен бірге адымдауда. Тек қадамын ширақ алған ұстаз бұл адымға ілесе алады. Сондықтан білімімді көтеріп отыру – кәсіби міндетім деп білемін.

«Мұғалім – өзінің білімін үздіксіз көтеріп отырғанда ғана мұғалім, ал оқуды, ізденуді тоқтатысымен оның мұғалімдігі де жойылады»- деген К.Ушинскийдің ілімін бетке ұстап 6 ай ұстаздық еткен уақытта 3 рет білімімді дамыттым.

Болмасаңда ұқсап бақ,

Бір ғалымды көрсеңіз...

Сізге ғылым кім берер,

Жанбай жатып сөнсеңіз... – деп Абай айтқандай тәжірибелі ұстаздар көшіне ілесіп 2 мәрте ашық сабақ өткіздім

Шәкірт білімі – ұстаз еңбегінің көрсеткіші. Жекелеген оқушыларымның білімімен мақтана аламын.

«Мектептің жаны – мұғалім. Мұғалім қандай болса, мектеп сондай болмақшы» дегендей мектептегі кәсіптік және шығармашылық педагогикалық іс-шараларға қатысып отыру – менің кәсіби әдетіме айналды.

Білім мен тәрбие егіз ұғым! Ұстаз әрқашан шәкірттің ішкі жан-дүниесін жаңартып, рухани азық болып, жарқын құбылыстарға жетекші бола бермек... Мен 5а сыныбының сынып жетекшісімін.

«Маған жақсы мұғалім бәрінен де қымбат, өйткені мұғалім - мектептің жүрегі» - деген екен Ыбырай Алтынсарин. Мен мектептің жүрегінің тоқтамай соғуына өз үлесімді қосамын деп сіздерді сендіре аламын!