Мәңгілік ел біздің ізгі мұратымыз эссесі

«Мәңгілік Ел-біздің ізгі мұратымыз!»

Ерлерді ұмытса да ел, сел ұмытпас,

Ерлерді ұмытса да ел, жел ұмытпас.

Ел үшін жаннан кешіп, жауды қуған

Ерлерді ұмытса да ел, шөл ұмытпас.

Ел жауын зерттеп, өрт боп, тынбай жортқан,

Ерлерді ұмытса де ел, бел ұмытпас.

Ел үшін тіккен ерлер қанын жұтқан,

Ерлерді ұмытса да ел, жер ұмытпас.

Арқаның селі, желі, шөлі, белі

Ерлерді ұмытпаса, ел де ұмытпас!

Мағжан Жұмабаев

Туған жер, атамекен, Отан, бабалар мекені ... . Көркем де қасиетті сөздер. Оларды қайталауға шаршамайсың. Туған жерім! Сені мақтан тұтамын, қастерлеймін, алысқа кеткенде сағынамын.

Егемен ел атанғанымызға жиырма бес жыл толғаны, әрине, үлкен бір белес. Қазақ ел болғалы тәуелсіздік жолында бел шешпей күресіп келеді. Оның нәтижесі-біздің ашық аспанымыз, тыныштық пен бейбітшілік. Сол үшін ата-бабаларымызға, елбасымыздың даналығына мың алғыс! Сондықтан біз өзіміз ел тарихын, туған өлке шежіресін, оның қашанда өнеге тұтар өр тұлғалы азаматтарын, аяулы перзенттерін үнемі жадымызда ұстап, қастерлеп, сабақта оқушыларымызға, отбасыда балаларымызға айту, менің ойымша, өзімізді отаншыл, саналы адам ретінде есептейтін болсақ-біздің басты борышымыз.

Мәңгілік елге жету жолының тарихы-ата-бабаларымыздың асыл арманы. Өткен тарихымыздың көзімен қарасақ, біздің жыл санауымыздан бұрын Күлтегін заманында Ғұн билеушісі Мөде патша «Енді біз төрткүл дүние танитын Мәңгілік Ел болдық» деген екен. Кейін Ұлытауда осы ұран тағы қайталанды. Үш жүздің көсемдері, билері бас қосқанда ұлы жиында «бір мақсат, бір мүдде, бір болашақ» деп тасқа қашап жазған сөздер бар. Олай болса, осы мақсатты Елбасы қайта тірілтті. «Біз үшін болашағымызға бағдар ететін, ұлтты ұйыстыра ұлы мақсаттарға жетелейтін идея бар. Ол- Мәңгілік Ел идеясы»-деп атап көрсетті. Мәңгілік ел болуды ата-бабаларымыз сонау Орхон-Енисей жазулары пайда болған кезден бастап аңсаған. Бәріміз білетін Білге Қағанның кеңесшісі Тоны Көк 680-745 жылдар шамасында Түрік елін Мәңгілік Ел ету үшін өлместей бағдарлама жасаған. Бұл тарихымызда бар шындық. М. Ломоносов айтқандай: «Өз тарихын білмеген халықтың болашағы жоқ».