Мәңгілік елдің кепілі ұлағатты тәрбие эссесі

Мәңгілік елдің кепілі -ұрпаққа берген ұлағатты тәрбие-.

Туған жер деп кеудемді кере демалғанда жүрегім мақтаныш сезіміне толады. Қазақстанның кең даласындай байтақ дала, бір шетінен екінші шетіне дейін құс қанаты талатын ұлан-ғайыр кең өлке еш жерде де жоқ шығар. Еліміздің байлығы өте көп және қазынаға бай. Табиғаты сұлу, биік-биік асқар тау, мөп-мөлдір көлдері, неше түрлі өсімдіктері бар, жері шұрайлы, шөбі шүйгін елімнің.

Тәуелсіздікке қол жеткізген сәттен бастап өз елін жарқын болашаққа бастап келе жатқан Нұрсұлтан Назарбаев сынды Ұлы көшбасшысы бар Қазақ елі – аз уақыт ішінде тарихта бұрын-соңды болмаған табыстарға қол жеткізді.

Тәуелсіздік таңы атып, егемен ел атанып, шекарамызды бекіткен сәттен бастап ұлттық идея мәселесі, исі қазақтың ойында болған және белсенді қолға алынды. Бұл тұрғыда көптеген ұсыныстар ортаға салынып, қоғамда қызу пікірталастар болғаны белгілі.

Ұлттық идея – туған жер, өскен орта әсерлерінен қалыптасып, халықтың тілі, ауыз әдебиеті, салт-санасы, әдет-ғұрпы, ырымдары мен тыйымдары арқылы жүйеленген этностық сезім. Ол – ұлттың болмысы, психологиялық өзіндік ерекшелігі. Ұлт бар жерде ол да бар. Ұлтпен бірге өмір сүреді, жойылмайды, құбылып өзгермейді.

Президент өз сөзінде: «Мен қоғамда «қазақ елінің ұлттық идеясы қандай болуы керек» деген сауалдың жиі талқыға түсіп жүргенін естіп жүрмін, біліп жүрмін. Біз үшін болашағымызға бағдар етіп ұлтты ұйыстыра ұлы мақсаттарға жетелейтін идея бар. Ол – мәңгілік ел идеясы. Тәуелсіздігімізбен бірге халқымыз мәңгілік мұраттарына қол жеткізді. Біз еліміздің жүрегі, тәуелсіздігіміздің тірегі мәңгілік елордамызды тұрғыздық. Қазақтың мәңгілік ғұмыры ұрпақтың мәңгілік болашағын баянды етуге арналады. Ендігі ұрпақ – мәңгілік қазақтың перзенті. Ендеше, қазақ елінің ұлттық идеясы – Мәңгілік ел» деді. Н. Назарбаев өз тәуелсіздігімізді көздің қарашығындай сақтау арқылы Мәңгілік ел бола алатынымызды атап өтті.

Сонымен қатар, Елбасы «Нұр Отан» партиясының кезекті XVI съезі барысында: «Мәңгілік Ел» идеясы оқу бағдарламасына енуі керек. Бұл идея қазақстандық бірегейлік бағытындағы ең маңызды құжатқа, екінші конституцияға айналуы қажет. Осыны ұғынуға тиіспіз» деді.

Расында да, «Мәңгілік ел» идеясын зерттеп, зерделеуде, насихаттауда және оқу үдерісіне енгізуде жалқаулық танытпау керек. Бұл орайда көзі ашық, көкірегі ояу әрбір отандасымыз, ата-аналар, тәрбиешілер, мұғалімдер , зиялы қауым үлес қосқаны абзал.

Ұлттық идеямызды балабақшада тәрбиеленіп жатқан бүлдіршіндерден бастап оқушыларға, білімгерлерге жете жеткізу үшін қажырлы жұмыс істеуіміз керек. Өскелең ұрпақтың санасына, өмір салтына сіңген құндылық пен сенім «Мәңгілік ел» орнатудың қозғаушы күші болары күмәнсіз.

Міне, біз бала-бақшада бүлдіршіндермен тәрбие жұмыстарын жүргізіп отырып, қазақ халқының болашағы осы балалар екенін естен шығармай, олардың санасына ұлттық идеяны сіңдіруге тырыссақ, Қазақстанның келешегі кемел екеніне сенеміз.

Тәрбиеленушінің сөйлеу тілін дамыту арқылы сөздік қорларын молайту, ой-өрісін кеңейту, жас ұрпақтың патриоттық сезімін жандандыра түсіп, елін, жерін сүйіп, құрметтеуге жетелеуде, өз тарапымыздан түрлі тәрбие сағаттарында балалардың бойында патриоттық сезімді тудыратын, өз еліне деген, Отанына сүйіспеншілігін арттыратын мәнді, мағыналы көріністер көрсетеміз. Ол наурыз мерекесінде өтетін тақырыптық іс-шаралар. ( Тұсау кесер, Әз-наурыз ,..т.б)

Тәуелсіздіке қол жеткізіп, оны әрі-қарай ұстап қала алмаған елдер де бар. Өйткені олар өз ана-тілдерін ұмытты, өз салт-дәстүрлерін қадірлемеді.