Маңғыстау – маңғаз мекенім тақырыбындағы мақала

Маңғыстау- маңғаз мекенім

Қарт Каспийдің құшағында жатқан алып дала, қасиетті 362 әулие орын тапқан киелі мекен Маңғыстауым...Талай зұлмат күндерді өткізген,миллиондаған тарихқа куә, мыңдаған жұрт көшіп-қонған, тоғыз жолдың торабында орналасқан тарихи жер мың қыстауым! Сенен нәр алған,сенің ыстық топырағыңда ойнап құмды дауылыңмен қатарласа жүгіріп өскен бала әлемді айналса да, дәл өзіңдей маңғаз мекенді таба алмас. Шұрайлы жер іздеген Асан қайғы бабамыз да бұл мекенге үш мәрте келіп-кеткен. Бір келгенінде ол:« Топырағының майы бар екен. Түбінде еліне құт-береке әкеледі» - деп тектен-тек айтпаса керек. Міне, соның дәлелі,жеріміз мыңғырған ірі қараға жайылым болып, қара алтын мұнайдың аса ірі ошағына айналып отыр.

Н.Ә.Назарбаевтың «Маңғыстау тұрғындарына көп адамдар өмірінде тым құрығында бір рет болып көруді армандайтындай жерде тұру бақыты бұйырған» дегені бар. Біз сол бақытты тұрғындармыз. Аталарымыз білектің күшімен алып берген қасиетті маңғаз өлкем Маңғыстауым... әр сайында бір тарих бұқпалаған түртіп қалсаң тау-тасы да сөйлеп кеткелі тұрған жұмбақ мекенім сен де туған әр ұрпақ бақытты!

Адайдың ұлдары тілеуіңді тілеп,сен үшін жатқа қарсы белді бекем буа алады. «Маңғыстау... Тарих пен табиғаттың бірге толғанған тамаша дастаны, бірге салған таңғажайып суреті,бірге шерткен тағылымды шежіресі. Оны таңданбай көріп,тамсанбай түйсінуің мүмкін емес» дейді заңғар жазушымыз Әбіш Кекілбаев. Бүгінде Маңғыстауды қазыналы түбек, тарихи ескерткіштер мен мыңдаған жолдар өлкесі деп атайды. Ұлы геолог,Қазақ КСР Ғылым академиясының тұңғыш президенті, КСРО ҒА академигі Қ.И.Сәтбаев бірде түбекті ұшақпен айналып ұшқанда, оның құм пердесімен жабылған әйелдің кескініне ұқсайтынын байқап, оны «ұйқыдағы ару» деп атаған.

362 әулиесі желеп-жебейтін әулиесі өлкем сен туралы әлі жазылатын жыр-дастандар қаншама? Туған елім, жерім деп тебіренетін жас ұрпақ әлі талай атыңды көкке шығарады.

Еліміз жаңа тарихи кезеңге аяқ басты. Рухани жаңғыру аясында Маңғыстаудың жер-су атаулары, батырлары,әулиелері,ескерткіштері,тылсым табиғатынан сыр шертер «Маңғыстаунама» пәні жоғары сынып оқушылары үшін оқу бағдарламасына енгізілсе деген үлкен тілек бар. Себебі, өз жерінің тарихын білмей өскен баладан не күтуге болады? Сондықтан осы күрмелі сұрақтың шешімін уақыт еншісіне қалдырайық.