Мақал мәтелдер айтысы сыныптан тыс жұмыс 4 сынып

Мақал – мәтелдер айтысы

Мақсаты

Мақал – мәтелдерді күнделікті өмірде қолдана білу, олардың тіліміздегі сөздің көркі екенін ұғындыру. Оқушылардың логикалық ойлау қабілетін дамыту, сөйлеу мәдениетін жетілдіру. Мақал – мәтелдер арқылы оқушыларды адамгершілікке, отаншылдыққа тәрбиелеу.

Барысы

1. Ұйымдастыру кезеңі.

2. Кіріспе.

Қымбатты ұстаздар, оқушылар! «Сөздің көркі – мақал» деген аталы сөз бар. Мақалдың көмегімен айтайын дегеніңді ұнамды да ұтымды жеткізуге болады. Мақалды көп біліп көп қолданатын адамдардың білімі де, ақылы да арта түседі. Қазақ халқының би шешендері бір ауыз ұтымды сөзбен, оралымды, келісті мақал –мәтелмен небір дау – дамайларды шешкен. Сондықтан да мақал – мәтелдерді үйрену, оның мағынасын түсіну біздерді қазақ халқының тарихын, мәдениетін, әдет – ғұрпын түсінуге, шебер де әдемі сөйлеуге үйретеді.

Мақал – мәтелдердің айтары өсиет, ұлағат, тәлім, парасат, ізгілік. Мақал – мәтелдер де халық мұрасы.

Енді 4 «А» сынып оқушыларының дайындаған «Мақал – мәтелдер» айтысын көріп тамашалаңыздар.

Сүндет: Сәлеметсіз бе? «Көрген жерде ауыл бар» - деп келіп қалдық.

Мағжан: Көрші ауылға тойға бара жатыр едік, сіздердің ауылдарыңызға тоқтап сусын ішсек бола ма?

Рамазан: « Алыстан алты жасар бала келсе, алпыстағы шал сәлем береді» - демекші, халдарыңыз қалай?

Шыңғыс: «Алыстан сәлем береді, әдепті елдің баласы» - дегендей қандай әдепті баласыңдар?

Нұрлан: «Келгенше қонақ ұялады, келгеннен соң үй иесі ұялады» - деуші еді, келіңіздер, төрге шығыңыздар, қонақ болып кетіңіздер.

Азамат: «Жат асына қарайды, дос басына қарайды» - деуші еді аталарымыз қысылмаңыздар.

Сүндет: «Қонағын сыйласа, төрге шық» - дегендей төрге шығайық.

Елдос: «Жаңбырменен жер көгерер, батаменен ел көгерер» - дегендей дастарқанға бата берейік.

Рамазан: «Жылқы кісінескенше, адам сөйлескенше» - демекші таныса отырайық.

Махамбет: «Мыңның атын танығанша, бірдің түсін біл» - деген, есімдеріңіз кім болады. (бәрі танысады)

Нұрасыл: «Ас адамның арқауы» - деген, ас алып отырайық.

Шыңғыс: «Ойбай-ау, жақсы ас қалғанша, жаман қарын жарылсын»

Елдос: «Досыңның асын қасындай іш!» - демекші, Алла риза болсын!

Махамбет: «Дастарқанға ас қойдым, екі қолды бос қойдым» - деген ас алып отырайық.

Дарын: «Көңілмен берсе қара су да бал татар».

Нұрасыл: Ия, «Досы жоқ адам, тұзы жоқ тағам» - демекші, досың көп болғанға не жетсін!

Мағжан: Халқымызда «Қонақ кәде» деген болушы еді. «Өнерлі өрге жүзер» -дегендей өнерлеріңіз болса көрсете отырыңыздар.

Нұрлан: Олай болса, біздің ауылдың балалары мен сіздердің ауылдарыңыздың балалары мақал-мәтел айтып жарысып көрсін.