Мектепалды даярлықтың маңызы туралы эссе

Мектеп алды даярлық тобы мектептерге қажетпе ?Әрбір бала үшін мектептің орны бөлек. Соның ішінде мектеп табалдырығын жаңа аттаған шәкірт үшін ерекше. Ал олардың әрқайсысының мінезін, қызығушылығын түсіну –педагогтың шеберлігі. Мектепалды даярлықтың болуы өте маңызды. Оны төменде дәлелдеп айтатын боламын.

Педагог В.Ф. Одаевский мектепке дейінгі жаста оқытуды «Қандай да болмасын ғылымға дейінгі ғылым» деген екен.

Менің ойымша, мектепалды даярлық әр уақытта да керек. Себебі, бала бірден барлық нәрсені түсіне бермейді. Олардың ой-санасы, мінез-құлқы толық жетілмейтіндіктен үйрену, түсіну қиын болады. Олар бала болғандықтан таным-түсініктері, әрқайсысының қызық та өзіндік көзқарастары болады. Мектепалды даярлық сыныбында тек балаларға ойын ойнатады немесе құр отырады деп пікір айту орынсыз. Балалардың бұл сыныпта іргетастары қаланады. Балалардың мектепке, білім алуға ынтасын осы сынып арқылы оятуға да болады. Білім бастауы осы даярлық сыныбынан басталады. Әр нәрсеге деген көзқарас, ынтамен қоса, мұнда, сауаттылық пен тәрбие де бар.

Өз сөзімді дәлелдей кетсем, егер даярлық сыныбы болмаса, онда, балалар бірден оқулықпен жұмыс жасауға немесе бірден күрделі білімге келеді. Бұл әлі оң мен солын айыра алмайтын балаға әрине, қиын да күрделі. Бұл сыныпта баланың мектепке психологиялық дайындығымен қоса, дәстүрлі түрде тән болған кейбір арнаулы білімдер мен дағдыларды-тіл дамыту, сауат ашу, математиканың қарапайым есептері де орын алады. Даярлық сыныбында сонымен қоса, шығармашылық та маңызды орынға ие. Мысалы, ән-саз, сурет салу сияқты қарапайым сабақтар. Бұл бастамалар даму жолына түскен бала үшін де, бастауыш сынып үшін де өте маңызды.

Мектепалды даярлық сыныбында баламен қоса маңызды орынға ие, ол - педагог. Педагогтың әрбір айтқан сөзі бала үшін заң секілді. Ол педагог алдында отырған бота көздердің ішкі ойын, сұрақтарын айтпай-ақ білуі керек. Бұл өте маңызды. Даярлық сыныбының мұғалімі балаларға білім беріп қана қоймай, оларды психологиялық тұрғыдан да ашады. Тәй-тәй басқан сәби секілді алғашқы қадамды осы даярлық сыныбы мұғалімдері жасайды. Сондай-ақ даярлық сыныбының болуы педагогтарды барлық жағынан дамытады.