Мектепті қауіпсіздік пен сенім кеңістігіне айналдыру

Мектеп – қауіпсіздік пен сенім кеңістігі

Білім беру жүйесінің басты құндылығы – баланың өмірі мен денсаулығы, қауіпсіздігі мен құқығы. Осы құндылықтар сақталған ортада ғана сапалы білім мен саналы тәрбие беру мүмкін болмақ. Қазіргі таңда әлемдік тәжірибе де, отандық білім саясаты да осы қағиданы басшылыққа алып отыр. Өйткені бүгінгі мектеп – тек білім беретін орын ғана емес, әрбір оқушы өзін қауіпсіз әрі сенімді сезінетін кеңістік болуы тиіс. Сондықтан «Мектеп – қауіпсіздік пен сенім кеңістігі» деген ұғымды тек ұран ретінде емес, нақты мазмұнға ие қағида ретінде қабылдауымыз қажет.

Е.Бозғұлов атындағы №249 мектеп-лицейінде аталған ұстаным – күнделікті қызметтің өзегіне айналған. Біздің басты міндетіміз – оқушының әр күні мектеп қабырғасында жайлы, тыныш, қауіпсіз ортада өтуі. Себебі қауіп төнген, сенім бұзылған ортада баланың зейіні, қабілеті де ашылмайды. Бұл бағыттағы жұмыстардың нәтижелілігін көрсететін басты көрсеткіш – соңғы үш жыл ішінде мектебімізде ешқандай суицид әрекеті, қылмыстық оқиға немесе оқушылар тарапынан құқықбұзушылық тіркелмегендігі. Бұл – тек мектеп ұжымының емес, ата-аналар мен жергілікті билік, құқық қорғау органдары арасындағы өзара сенім мен бірлескен әрекеттің жемісі.

Қауіпсіз орта құру – кешенді шараларды талап ететін жүйелі жұмыс. Бірінші кезекте, мектептің ішкі тәртібі, бейнебақылау жүйелері, мектеп инспекторының жұмысы, оқушылардың жүріс-тұрысын қадағалау мәселелері толық қамтылуы тиіс. Мектебімізде бұл бағытта нақты ережелер мен алгоритмдер қалыптасқан. Әрбір кіреберіс, дәліз, аула бейнебақылаумен толық қамтылып, мектеп инспекторы тарапынан күнделікті кезекшілік және рейдтік шаралар ұйымдастырылады. Әсіресе оқушылардың таңертеңгі мектепке келуі мен сабақтан кейінгі қауіпсіз үйге оралуы басты назарда ұсталады.

Сонымен қатар, психологиялық қауіпсіздік те ерекше мәнге ие. Мектеп оқушылары тек физикалық тұрғыдан ғана емес, эмоционалды жағынан да өзін жайлы сезінуі тиіс. Осы мақсатта мектеп психологы оқушылармен үнемі байланыста болады. Жеке және топтық кеңестер, сауалнама, тренинг, арт-терапия сияқты әдістер арқылы балалардың ішкі күйі мен көңіл-күйін бақылап, тиісті қолдау көрсетіледі. Эмоциялық тұрғыдан жарақат алмау – тұлғаның үйлесімді дамуына ықпал ететін маңызды фактор. Сол себепті мектебімізде кез келген оқушының өз ойын еркін айтуына, өзіне сенімді болуына мүмкіндік жасалған.

Оқушының сенімі – мұғаліммен, сынып жетекшісімен, ата-анамен арадағы ашық әрі адал қарым-қатынастан басталады. Біздің мектепте баланың пікірі мен дауысы маңызды. Ол өзін қоғамның бір мүшесі ретінде сезініп, ортақ шешімдерге қатысады. Бұл бағытта «Оқушылар…