Мектептің сапалы білім мен саналы тәрбие ордасы ретіндегі рөлі

Мектеп —сапалы білім, саналы тәрбие ошағы

Егемен еліміздің ертеңі бүгінгі жас буын екені даусыз! Ұлы ағартушы Ахмет Байтұрсынұлының «Балам деген жұрт болмаса – жұртым дейтін бала қайдан шықсын» деген аталы сөзін басшылыққа алып, біздің ел болып атқарар міндетіміз — болашағымызды сеніп тапсыра алар жас ұрпақты қалыптастыру. Бұл жолда жүктің ауыры ата-анамен қатар мектепке түседі. Себебі, мектеп жасындағы баланың уақытының басым бөлігі білім ордасында өтеді. Мектеп — сапалы білім ғана емес, саналы тәрбиенің де көзі. Тәрбие мен білім бір-бірінен ажыратуға келмейтін егіз ұғым, өйткені білімді, бірақ рухани ашөзек адамнан қоғамға пайда болмайды. Сондықтан мектептегі әр ұстаз пәнін жетік білетін маман, һәм қоғам алдындағы жауапкершілігін түсінетін, бала жанын жараламай білімге баули алатын нағыз ұстаз болуы қажет. Қазақ тілі мен әдебиеті пәнінің мұғалімі ретінде менің де көздейтінім — септіктер мен ақын-жазушылардың атын жаттату ғана емес, қазақ тілінің бай қазынасы арқылы алдымдағы шәкірттің ішкі жан-дүниесіне сәуле шашу, баланың тұлғалық болмысын ашу. Әр бала жер астынан табылған алмаз сынды, ұстаз жұмысы — білім-біліктілігімен алмаздың ғажайып қырларын шығарып, бриллиант жасайтын күрделі еңбек.

Технологиялар тез дамып, күнде бір жаңалық ашылатын қазіргі кезде ең құнды қабілеттер — адам баласының шығармашылық дамуы, еркін ойланып, батыл әрекет жасап, қоғаммен қарым-қатынас орната білуі. Жас ұрпақтың бойында бұл қырларды бүгіннен дамыту үшін мен олардың ішкі потенциалын жарыққа шығаруға күш саламын. Шәкірттерім түрлі олимпиадаларға, жарыстарға қатысады. Мұндай сайыстарға қатысқан оқушыларым өмір бәйгесінде үздік болу үшін ең басты қажырлы еңбектің қажеттігін түсінеді. Өздеріндей балалармен танысып, көпшілікпен араласуды үйренеді.

Адам баласы — бірыңғай жақсы не жаман деп бөлуге келмейтін, қат-қабат қатпарлары бар күрделі болмыс. Ал әдебиет болса, адам жанының осынау сан қырлы тереңіне үңілуге көмек беретін, бойыңдағы ізгілік шамын жарқыратуға әсер ететін құрал іспетті. Оқушы әр кейіпкердің жан толқынысын сезіп, дүниеге өз көзқарасын қалыптастырады. Мен сөз өнерінің осынау күшін жас ұрпақтың бойында адамгершілік қасиеттерді өркендетуге пайдалануға тырысамын. Шәкірттеріммен «кітапсүйерлер клубын» ұйымдастырып, айына бір кітап оқып, талдау жасаймыз. Кітапталдау барысында маңыздысы мазмұнын қайталап айту емес, әр оқушының өзі үшін алған пайдасымен, жеке түйіндерімен бөлісу. Клуб жұмысын жүргізуде біз «телеграмм» әлеуметтік желісін қолданамыз. Мұндай формат кітапқұмар қауымның артуына жақсы мүмкіндік береді.

Поэзияға жаны жақын шәкірттерім сүйікті ақындарының өлеңдерін жаттап, жатқа оқу сайыстарына да қатысады. 9- сынып оқушысы Сейлбаева Жұлдыз Ілияс, Сәкен оқуларына қатысып, жүлделі ІІ орын иеленді. Исәділ Ақтілек есімді шәкіртім Қадір Мырза Әлі оқуынан бас жүлдені қанжығасына байлап қайтты. Өлең-жыр жаттау балалардың сөздік қорын молайтып, есте сақтау қабілеттерін арттырумен қатар, оларды…