Менің әжем тақырыбына қазақ тілінен эссе үлгісі

Менің әжем-белсенді зейнеткер

Әже...

Осы бір үш әріптен тұратын сөз құлаққа жағымды, жүрекке жылы естіледі. Әже-әрбір отбасының ұйытқысы, балалардың ақылшысы. Сәби дүниеге келген сәтінен бастап әженің айтқан жырын тыңдап өседі. Әженің ақылын тыңдап өскен бала тілалғыш, бауырмал болып өсетіні анық.

Менің әжем де өз немерелерінің бағбаны, ақылшысы. Оның жасы қазір 63-те. Әжем өнерлі жан. Баян тарту, құрақ құрау-әжемнің сүйікті істері дер едім. Ол үнемі бізден ақылын аямайды. Бойымдағы жақсы қасиеттер әже тәрбиесімен даруда. Сабағыма да әжем қол ұшын беріп отырады. Кейде қатаңдық танытса да, соңынан «айналайын» деген сөзін асыға күтіп отырамын. Қашан да қас-қабағымызды танып отыратын әжетайымның үнемі жанымызда болғанын қалаймын.

Әжем қаншама жылдар темір жолда еңбек етті. Краншы болып еңбек еткен әжемнің еңбегін ерлікке теңеймін. Қазір сол жасаған бейнетінің зейнетіне бөленуде. Өзінің еңбек еткен жолдарын маған әңгімелеп береді. Сондай сәттерде әжемді құдды аңыз кейіпкеріндей көремін. Бүгінгі таңда әжем өзі еңбек еткен ұжымына сыйлы зейнеткер. Мерекелер сайын әжеме ұжымынан шақырулар келіп жатады. Сондай сәттерде әжем де біз де қуанып қаламыз. Әжем өзінің жолын қуған әкеме ақылшы-ұстаз. Әрдайым өзінің көрген білгендерін әкеме үйретіп отырады. Теміржолда еңбек етіп зейнетке шыққан ана және өзінің жолын куған баланың әңгімелері қызықпен өрбіп, үйлесім тауып жатады.

Мен де оқудағы жетістіктерімді ең әуелі әжеммен бөлісіп отырамын. Үнемі әжемді қуантқым келіп тұрады. Қандай да бір жетістікке жетсем, ол әжемнің тілегінің арқасы.

Әже, асыл әжем!

Мен сіздің алдыңызда қарыздармын. Сіз берген тәрбиенің арқасында елін, жерін сүйетін адал перзент болатыныма уәде беремін.

Әжем менің!

Мен өзіңнің арқамнан сипайтын алақаныңның жылуын ештеңеге айырбастамаймын. Өзің үміт күткендей тәрбиелі, ақылды перзент болатыныма сендіремін.

Асыл әжем!

Мен сенімен әрдайым мақтанамын. Ешқашан ауырмай, біздің тілеуімізді тілеп, арамызда жүре бер! Барлық әжелер аман болсын!