Менің сыныбым менің мақтанышым туралы эссе 9 сынып

Түркістан облысы,Отырар ауданы,Ақтөбе ауылы

«Қ.Мұңайтпасов атындағы жалпы орта мектеп»

Ағылшын тілі мұғалімі М.Туребекова

Менің сыныбым-менің мақтанышым!

Мектеп-білім алдындағы үлкен кеме.Ұстаз –мектеп айнасы.Өмірде әр нәрсенің бастауы болатындай, қай саланың құзар шыңында «ұстаз» дейтін ұлы ұғым тұр. Біз кие тұтып, қызыққан салалардың бәрі де ұстаз алдынан өтеді. Қолды икемдетіп, хат жазуды бастап үйрететін де, саңқ етіп сөйлеу мен әуездетіп ән айтуды ұстаздан үйренеміз. Әр оқушы үшін ұстазы қашанда биік тұлға.Әр мұғалімнің жұмысында күрделі, бірақ өте маңызды миссия бар. Ол – сынып жетекшісі болу. Ұстаздық жолымда сынып жетекші болғаныма мақтанамын.Өйткені бала – жанып тұрған шырақ. Шырақтың одан сайын жарқырап жануы, яғни әр баланың бойындағы «отты» сақтау – сынып жетекшісінің басты мақсаты.

Кейбір мұғалімдер бұл жұмысты олардың педагогикалық қызметіне қосымша жүктеме деп санаса, басқалары оны ең маңыздысы деп атайды. Сынып жетекшісінің жұмысы қаншалықты қиын болса да бұл, әрине, балаларға қажет. Өйткені сынып – мектептің негізгі құрылымдық буыны.

Ұстаздың жолы – арқалаған армандар мен үміттер жолы. Менің жолым – жанымның, жүрегімнің, бүкіл ішкі әлемімнің таңдауы. Мен әр шәкіртіме зор сеніммен қараймын, әр шәкіртім арқылы болашаққа үміт артамын. Әр шәкіртіме біліммен тәрбие беру арқылы жаңа қоғамның, жаңа Қазақстанның бір кірпішін қалап жатқанымды сеземін.

Мен үшін алдымдағы әрбір оқушымның бойында адами қасиеттердің болуы өте маңызды. Адами қасиет жоқ жерде, білім мен тәрбиеге де орын жоқ. Әр оқушыма ерекше көңіл бөліп, білмеген жерін үйретуден еш жалыққан емеспін. Оқушыларыма әрдайым: «Еліміздің ертең сендерсіңдер,еліміз сендер арқылы озық елге айналатын болады»,– деп айтып отырамын. Әр оқушымның ұлт мүддесін алға тартып, кішкентай болсын жетістікке жеткені – мен үшін үлкен мақтаныш.Мен өз таңдауымды дұрыс жасағаныма сенімдімін.Үнемі ізденіс үстінде жүріп, сынып сағаттарын қызықты ету, сайыстардан алдыңғы орында көріну,сауатты да тәрбиелі шәкірт тәрбиелеу – менің өмірлік мүддем. Оқушылармен, ата-аналармен, мұғалімдермен ынтымақтаса жұмыс жасауда мұғалім алдына қойған мақсаттарын ойдағыдай іске асырса, өзінің кәсіби жұмысының жемісіне жете біледі.