Менің жарқын болашағым тақырыбындағы эссе, 2-сынып

Менің жарқын болашағым

Науханова Ұлболсын, 9 жаста

3 «Б» сынып

№37 жалпы орта білім беретін мектеп

Болашақ... бұл сөзді естігенде көз алдыма тәуелсіз елім, бақытты отбасым елестейді. Өзімді білімді азаматша болып, ата-анамның үкілі үмітін ақтағандай сезінемін. Әрине, бұл менің қиялымнан туған болашағым. Өйткені өмірде сан қилы жағдайлар болады, соған қарамастан адам өз өмірін дұрыс қалыптастыра білуі тиіс деп ойлаймын.

Бүгінде Қазақстан көркейіп, дамыған ел ретінде әйгілі болды.Бұның дәлелі ЭКСПО-2017.Экономикасы да қарқынды дамуда. Халқы тәуелсіз, бақытты өмір сүріп келеді. Бұл біздің кемеңгер елбасымыз Нұрсұлтан Әбішұлы Назарбаевтың өрлі саясатының нәтижесі деп білемін.Елімізде түрлі мекемелер, ғимараттар, ауруханалар, мектептер салынып, медициналық құралдар жетілдірілуде. Осыған қарап-ақ Қазақстанның алдағы болашағын бағдарлай берсек болады.

Әрқайсысымыздың маңдайымызға жазылған тағдырымыз, болашағымыз бар, арманымыз да жетерлік. Мысалы мен өскенде Шара Жиенқұлова апамыз секілді биші болғым келеді. Мен биші болу үшін үнемі жаттығып, үйірмелерге қатысуым керек. Мүмкін мен басқа бір мамандық иесі болатын шығармын. Бірақ биші болу менің бала күнгі арманым ретінде мәңгі жадымда қалмақ.

Менің болашаққа ойластырған жоспарларым көп. Оқып, білімді тұлға болып, ата-анамды барлық қажеттіліктерімен қамтамасыз еткім келеді.

Қортындылай келгенде, адам өз болашағының іргетасын өзі қалайды. Оның дұрыс қалануы да өзіне байланысты. Бүгінгі өміріміз егемендікке негізделсе, болашағымыз әлбетте жарқын болады.