Мұғалімдерге арналған эссе үлгісі және шығармашылық есеп

Эссе

«Болашақтың ұстазы»

Тәуелсіз Қазақстандағы өркениетке бастар жолдың бастауы мектеп десек, мектеп- кемел келешекке апарар білімнің алтын шамшырағы.

Қазақ әдебиетінің көрнекті тұлғасы Ахмет Байтұрсынұлы «Мектептің жаны – мұғалім. Мұғалім қандай болса, мектеп сондай болмақшы...Ең әуелі мектепке керегі – білімді, педагогика, методикадан хабардар, жақсы оқыта білетін мұғалім»,- деп «Болашақтың ұстазына» қойылатын талапты сол кезде-ақ айтып кеткен. Мектеп, шәкірт, ұстаз-бір-бірінен ажырамас киелі ұғымдар. Білімнің алтын ошағы -мектептегі жаңашыл ұстаз ең алдымен шәкірттерінің жан жүрегіне адами қасиеттерді себетін тәрбиеші ұстаз болу керек. Көз алдында жанарлары жаудырап отырған жас ұрпақты «Өмір-атты теңізге» дұрыс бағдарлай білетін, яғни мектепте алған білімін өмірде пайдалана алуына үйрететін «Ұстаз-ана» болу керек. Өмір –теңізінде ізгілік атты кемемен жүзе білген ұстаз «әр шәкірт өз жұлдызының жарқырауына өзі жәрдем етуі қажет» деп әрдайым есептеп, әрі өскелең ұрпақ тәрбиесі үнемі толғандыратын ұстаз нағыз «Ұстаз» деген атқа лайық. Тума таланттың тұма бұлағын ашу, тот баспас алтынның қасиетін алыстан танып бағалау ұстаздың мерейлі парызы болса, ол мейлі, математика, география, немесе биология тағы басқа пәндердің мұғалімі болсын, барлық ұстаздарға қойылар талап –өз шәкірттерінің болашағына сара жол салып, сөз өнерінің құдіретін

«Болашақтың ұстазы» қандай болу керек, «Болашақтың ұстазы» ретінде мен өзіме қандай талаптар қоямын, аталған талап үрдісінен қалай шыға аламын? Осы сұрақтарды өзіме қойғанда, ойым сан тарауға кеткендей... Миымда сансыз саумалаған көп ойлар бір арнаға тоғысқандай.

Қазақ халқының ұлы жазушысы М.Әуезов «Мұғалімнің ұдайы жақсы оқитын балаларға ғана сүйсініп, ылғи соларды ғана оқытуы дұрыс емес» деп сабақ берудегі мұғалімнің роліне баса назар аудартады. Мұғалім оқушыға ең мықты білімнің алтын кілтін ұстатады. Балаға ең қымбат нәрсе - білімді дайын күйінде бермей, білімді өзі алатындай біліктермен қаруландыру-әр мұғалімнің басты міндеті болып табылады. Ендеше «Болашақтың ұстазына» жүктелер міндет оқушыларды білім мөлшерімен жабдықтау емес, білімді өз бетімен алу үшін құралдармен қамтамасыз ету болып табылады. Сондықтан да болашақта мен ұстазды көк аспандағы шуағын шашқан күн бейнесінде, ал оның айналасында қанат қағып самғай ұшып…