Мықты отбасы – берік мемлекеттің негізі семинар

Кошанова М.К..

М.Жұмабаев атындағы №39 гимназия

педагог-психолог

Қарағанды қаласы

Шеберлік сабағы: «Мықты отбасы – іргесі берік мемлекет»

Мақсаты: отбасы мен мектеп ынтымақтастығының берік іргетасын қалау, адам бойындағы құндылықтарды бағалай білуге үйрету.

Міндеттері:

Ата-аналардың мектеппен, мұғаліммен тығыз байланысын нығайту;

Балаларды білімге, мейірімділікке, ұстамдылыққа тәрбиелеудің жолдарын көрсету;

Ата-аналардың, балалардың, ұстаздардың бойындағы құндылықтарды ашу және бағалауға үйрету;

Адами құндылықтары арқылы бірін-бірі сыйлауға дағдыландыру

Жүргізілу түрі: семинар – тренинг, арттерапия

Қатысушылар: ата-аналар, ұстаздар, оқушылар

Қажетті құрал-жабдықтар: бейнетаспалар, гуашь, ватман, слаидтар, А3,А4 форматтағы қағаздар, ағаштар, стенд, жапырақтар қағаздан жасалған, қолға арналған крем, жадынамалар, караоке-ән, кілемше, шарлар, бейджик, қылқаламдар, қаламдар, маркерлар.

Семинар – тренинг барысы:

Психологтардың әнұраны қосылып тұрады. Көрермендер кіріп орындарыңа жайғасады. Кіре беріске кілемшелер жайылып тұрады.

Әр отбасын кіруге шақырамыз және аяқтарын кілемшеге сүртіп кіруді сұраймыз.

Бұл кілемше «Жағымсыз кілемше». Әр отбасында ыдыс-аяқ шылдырламай қоймайды дегендей аяқтарыңызды кілемшеге сүртіп, барлық жағымсыз эмоцияларыңызды, өкпе реңіштеріңізді және барлық жамандықтарды осы кілемшеге қалдырыңыздар.

Психолог сөзі: Құрметті ата-аналар, ұстаздар және балалар! Қош келдіңіздер! Бүгінгі шара психологиялық бағытта «Мықты отбасы – мықты мемлекет» атты тақырыбында өтпекші.

Отбасы – сыйластық, жарастық орнаған орта, кішкентай Отан. «Отан – отбасынан басталады» дегендей отанды сүю- отбасынан басталатыны рас! Себебі, отбасы – бала тәрбиесінің ең алғашқы ұжымы. Адамның жеке басының қалыптасуы отбасынан басталады. Не болса да Отанның бір бөлшегі – отбасыңа ештеңе де жетпейді! Өйткені отбасы – табиғаттың әр адамға сыйлаған керемет бір сыйы! Соны мәңгі есте сақтап, ұмытпаған жөн!

«Жұмыла көтерген жүк жеңіл»дегендей бала тәрбиелеуде осындай міндеттерді іске асырушылар – мектеп пен отбасы. Осы екі арнада жүргізілген тәлім тәрбие сабақтаса, ұштасып кешенді жүргізілгенде ғана мақсатымызға қол жеткізе аламыз. Мектеп - өскелең ұрпақты тәрбиелеу жүйесіндегі шешуші буын. Оның жас ұрпақты тәрбиелеудегі рөлі өте зор. Еліміздің жпотары мектеп арқылы өмірге жолдама алады. Отбасы - оқыту мен тәрбие жұмысындағы мектептің одақтасы. Ол бала тәрбиесі жөнінде мектеппен тығыз байланысты болуды өте жақсы түсінеді. Бала тәрбиесінің отбасында, мектепте нәтижелі болуы ынтымаңтастыққа негізделеді. Мектепте білім алу кезінде баланы ата-аналар тарапынан психологиялық қолдау – маңызды әрі салмақты мәселе. Оқу – бұл күрделі әрі жауапты еңбек.

Таныстыру: Құрметті ата-аналар, ұстаздар, балалар алдымен сіздермен танысып алайық! Танысуымыз ерекше болмақ. Әр қатысушы өзінің есімінің бас әрпіне байланысты бойындағы жағымды қасиетті қоса отырып өзің таныстырады. Мысалға: мен Мейірімді – Меруертпін.

Рахмет! Танысып алдық! Олай болса, келесі тапсырмаға көшейік. Келесі тапсырма «Елтаңба» деп аталады.

«Елтаңба» - әр топ өз Елтаңбаларын салуы қажет. Елтаңбада отбасын сипаттайтын символдар болуы шарт. (8 мин)

Талдау: әр отбасы өз Елтаңбаларын ортаға шығып талдайды.

Бейнеролик.

Ал қазір сіздердің назарларыңызға тамаша тәмсіл ұсынамын. ЭКРАНҒА НАЗАР АУДЫРЫҢЫЗДАР.

Психолог ана туралы тәмсіл бейнеленген №2 бейне-роликті көрсетеді. Көріп болғаннан кейін психолог былай дейді: (жаттап алу)

Ананың қамқорлығы, ананың нәзіктігі, ең бастысы – ананың махаббаты барлық ауыртпалықтардан ең басты шипа! Ананың жүрегі – ең сенімді қорған осы! Ана барлық балаларын жақсы көреді – баласы біреу ме, үшеу ме, немесе бесеу ме – бәрібір, оның махаббаты барлығына жетеді! Және бұны барлығы өте жақсы біледі. Құрметті аналар! Сіздердің ана ретіндегі бақыттарыңыз әрқашан баянды болады деп үміттенемін!