Неге спорт журналистикасын таңдадым атты мақала

Мақала

“Неге мен дәл спорт журналистикасын таңдадым?”

Спорт журналистикасы – бұқаралық ақпарат құралдарының спорттық оқиғаларды, аспектілер мен тұлғаларды көрсетуге бағытталған маңызды саласы. Бұл аймақ жарыстардың нәтижелерінен хабардар етіп қана қоймай, спорт әлемінің эмоцияларын, драматургиясын және интригаларын бойына сіңіреді.

Жалпы, спорт журналистика саласы – өте ерекше салалардың бірі. Дәл осы спорт саласы мені жігерлендіреді. Балуандарымыздың жеңісі мен жеңілісі. Белдесудегі қателіктер мен өкініші, партерде балл беріп қоймау үшін жанталасы, жеңіп келе жатып тушеге түсіп қалғандағы сәттерді сөзбен айтып жеткізу мүмкін емес. Сол белдесудегі 6 минуттың, 6 сағаттай болып кететіні тағы бар.

Спорт журналистері тек ойын нәтижелерін хабарлап қана қоймайды, сонымен қатар статистиканы, командалық стратегияларды және спорттағы трендтерді талдай отырып, терең зерттеулер жүргізеді. Оқиғалар туралы есептер мен ойыншылар мен жаттықтырушылармен сұхбаттар спорттық әрекеттің толық бейнесін береді.

Менің спорт журналистика саласына қызығушылығым 9 сыныптан бері басталды. Спорт саласына деген қызығушылығымның оянуына, ағамның үлкен әсері тиді десем де болады. Ағамның өзі грек-рим күресімен айналысады. Қазіргі кезде, грек-рим күресінен ересектер арасында Ұлттық құрама қатарында белдесіп жүр. Кішкентай кезімнен, ағаммен бірге көптеген жарыстарға барып жүрдім. Өзіме осы күрес саласы ұнағандықтан, ағаммен бірге үлкен әлемдік додаларға да дәл қазіргі кезде барып жүрмін. Өзімнің ағам күрескен кезде де, жанымыз шығып кете жаздайды. Мен дәл осы балуандарды түсінемін. Спортта жеңіс пен жеңіліс – кезек. Спортшылардың еңбегі ақталмай қалатын жағдайлар да болып жатады. Жеңіліс тапқан кезде, спортшылардан теріс айналатын адамдар аз емес. Ал керісінше, сондай кезде спортшыларымызға қолдау көрсете білуіміз қажет. Сағаттап жасалған жаттығудың нәтиже беретінін, жеңіс дәмінің тәтті екенін және де жеңілістің ащы дәмін спортшылар өте жақсы түсінеді. Балуандарымыздың жеңіске жеткен кездегі сезімімізді сөзбен жеткізу қиын, ол үшін мен секілді күреске ғашық болу керек-ау…

Спортшының “көк туымызды қалықтаты боз кілем үстінде ат-ой салып жүгірген сәтінде көзіңе ыстық жастың қалай ыршып түскенін де сезбей қаласың. Осындай бір себептердің әсерінен деесекте болады, спорт саласын таңдауды жөн көрдім.