Өзіңмен үйлесімді өмір сүру, 1-сынып сабақ жоспары

Өзiн-өзi тану сабағының жоспары

Мектеп :Ғ.Сланов атындағы орта мектеп Мерзімі: № 6

Тақырып: Өзіңмен үйлесімді өмір сүру!

Құндылық: дұрыс әрекет

Қасиеттер: адалдық, қарапайымдылық

Мұғалім: Қазмағанбетова А Сынып: 1 Оқушылар саны:18

Сабақ мақсаты:

Оқушыларға ар-ұжданына сүйеніп өмір сүрудің маңыздылығын жеткізу арқылы дұрыс әрекет құндылығының мәнін ашу.

Сабақ міндеттері:

Білімділігі: оқушыларды үйлесімді өмір сүруге үйрете отырып, қарапайымдылық қасиеті туралы түсінік беру.

Дамытушылығы: оқушыларды үйлесімді қарым-қатынас жасауға үйрету арқылы адалдық қасиетіне баулу.

Тәрбиелілігі: оқушыларды қарапайым, адал, үйлесімді болуға тәрбиелеу.

Ресурстар(материалдар, дереккөздер):

1.bilim-all.kz

2.https://infourok.ru

Сабақ барысы:

1. Ұйымдастыру кезеңi.

а)оқушылармен амандасу

ә)оқушыларды түгендеу

б)5Т-ны еске түсіру.

1. Тәртіп.

2. Талап.

3. Тыныштық.

4. Тазалық.

5. Татулық.

Балалар ережені есімізге түсіріп, сыныптың тәртібін сақтап, оқып - білуге талаптанып, тыныштықты орнатып, тазалықты сақтап, бүгінгі күнімізді татулықпен өткізейік.

2. Үй тапсырмасын тексеру.

Толымбек Әбдірайым «Қайыңның көз жасы» әңгімесін оқу.

-Қапан не үшін ұялды?

-Ар-ұжданымен өмір сүретін адамды қалай сипаттар едіңдер?

-Сендердің өз қылықтарыңа ұялған сәттерің болды ма? Неліктен?

Сабақ барысын талқылау:

3. Дәйексөз.

«Арыңды сақта, ар-ұждан керек әр уақытта» нақыл сөз.

-Хормен оқыту.Ұл балаларға бөлек, қыз балаларға бөлек оқыту.

-Жұмыс дәптерге жаздыру.

-Осы дәйексөз сендерге қандай ой салды?

-Оқушылардың жауаптары негізінде дәйексөздің мағынасын толық ашып, қорытындылау.

4.Мұғалім сыйы «Кірпіш» С.Жүнісов

Қаланың күнгей жақ шеті қашаннан құлазып, бос жатушы еді. Ол тұста жазды күні мал жайылатын, балалар асыр салып, доп ойнайтын. Ал қысты күні аппақ қар басып, алай-түлей боран түтеп тұратын. Бірлі-жарым бейсауат өткен ат-шаналы жүргіншілер мен шаңғы тепкен балалардың айқұш-ұйқыш іздері ғана жататын.

Өткен жазда осы араға дүбірлетіп көп құрылысшы келді. Аспанмен тұтасқан тырна мойын жүк көтергіш крандар пайда болды. Көп ұзамай зәулім биік үйлер сап түзей бастады. Бұл ара Сәулелер тұратын ескі ағаш үйден онша қашық емес-ті. Бірде Сәуле терезеден осылай қарап тұрды да:

-Әке, үлкен-үлкен үйлер кімдікі?-деп сұрады.

-Ол үйлерді бізге салып жатыр. Біткен соң, осындағы кішкентай үйлерде тұратындар сонда көшеді,-деді әкесі.