Қауіпсіз мектеп акциясының өтілу барысы туралы мақала

Қазыбек бек бекетіндегі орта мектеп мектепке дейінгі шағын орталығымен коммуналдық мемлекеттік мекемесінде өткен «Қауіпсіз мектеп» республикалық акциясы туралы

Алматы облысының білім басқармасының 2018 жылдың 23 шілдедегі №42-42/1840 хаты негізінде мектепте 20 тамыз бен 20 қыркүйек аралығында балалардың қауіпсіздігін қамтамасыз ету, оқушылар арасында және оларға қарсы құқықбұзушылықтың алдын алу және мектепте қауіпсіздік шараларын жетілдіру мақсатында «Қауіпсіз мектеп» республикалық акциясы өткізілді. Акция шеңберінде тамыз айында мектептің жаңа оқу жылына дайындығын тексеру мақсатында комиссия құрылып, оқу сыныптарының, спорт залдардың, мектеп асханасы, медициналық кабинет, су құбырлары мен жылу жүйесінің жұмысқа дайындығы тексерілді. Сондай-ақ, өрт қауіпсіздігі шаралары да тексеруден өтті. Қауіпсіздік шараларын нығайту мақсатында мектептің ішіне және сыртқы бөліктерге 16 бейнебақылау орнатылған болатын, барлығы бірқалыпты жұмыс істеп тұр. Қазіргі уақытта мектептегі оқу кабинеттер мен дәліздерге тағы 16 бейнебақылау орнатылуда. Мектеп фойесіне «Сенім жәшігі» орнатылған. Қазіргі таңда ешқандай хат келіп түспеді. Мектепке келетін жолға жүргіншіге арналған арнайы жол (тратуар) бар. Мектеп маңындағы жолда «Абайлаңыз, балалар!» жол белгісі орнатылған.

Балалардың қауіпсіздігін ұйымдастыру мен балаларға қатысты зорлық-зомбылықтың алдын алу бойынша қыркүйектің 3-і мен 10-ы аралығында сыныптық және жалпы ата-аналар жиналыстары өткізіліп, өгей әке, өгей шешесімен тұратын балалардың үйіне арнайы рейдтер жүргізілді. Жиналысқа ауылдық аурухана бас дәрігері Мусаева Сабира Әлжанқызы шақырылды. Бас дәрігер ата-аналарға балаларының жеке бас гигиенасына қатысты көптеген пікірлер айтты.

Акция барысында барлық 1-11 сыныптарда "Жол қалай сөйлеседі", "Жол қиылыстары және олардың түрлері", "Жолаушылар мен жүргізушілердің қозғалысы", "Мектепке қауіпсіз жол", "Жол және балалар" атты сынып сағаттары өтті.

«Қауіпсіз балалық шақ үшін!» ұранымен «Жас ұлан» ұйымының мүшелері 111-балаларға және жасөспірімдерге арналған сенім телефон линиясы көрсетілген қауіпсіз жүріп тұру ережелері бойынша және бөгде адамдармен қауіпсіз жүру бойынша парақшалар таратылды.

5 қыркүйек күні дене шынықтыру пәні мұғалімі Б.Мусабаева 9-11 сынып оқушыларымен «Жолда абай бол!» тақырыбында флешмоб ұйымдастырды.

12-14 қыркүйек күндері «Қауіпсіздік шұғыласы» тақырыбы аясында сурет көрмесі ұйымдастырылып, балаларға жолды дұрыс кесіп өту, жолдың жүру бөлігіндегі тәртіп ережелерін сақтау туралы айтылды.