Қазақ тілін оқытуда электронды оқулықтарды қолдану

Қазақ тілін оқытуда электронды оқулықтарды пайдалану маңызы

Болашағымыздың нұрлы да жарқын болуы құдіретті күш ғылым мен білімге байланысты. Елбасымыз Нұрсұлтан Назарбаевтың «Қазақстанның әлемдегі бәсекеге барынша қабілетті 50 - елдің қатарына кіру стратегиясы. Қазақстан өз дамуындағы жаңа серпіліс жасау қарсаңында» атты Қазақстан халқына арнаған жолдауында «Білім беру реформасы – Қазақстанның бәсекеге нақтылы қабілеттілігін қамтамасыз етуге мүмкіндік беретін аса маңызды құралдардың бірі» - деп атап көрсетілді.

Ал әлемдік білім кеңістігіне ену үшін Қазақстандық білім жүйесін ақпараттандыру жаңа табысты нәтиже бермек. Себебі оқытуды ақпараттандыру білімді жаңаша беруді қарастырады.

Мәселен, арнаулы орта оқу орындарында қазақ тілін компьютер арқылы оқыту студенттердің оқуға деген ынта-жігерін қалыптастырып тілге деген қызығушылығын арттырады, бағдарламалық материалдарды жақсы меңгеруіне ықпал етеді.

Компьютерді пайдаланудың бір ерекшелігі студенттердің дербестігін қамтамасыз етіп, өзін-өзі қадағалауға мүмкіншілік жасайды. Кейбір оқытушылар сабақта компьютерді пайдалану оқытушы мен студент аралығындағы байланыстың төмендеуіне келіп соғады деп ойлайды.

Менің ойымша, студент компьютермен жұмыс барысында студент өзін еркін сезінеді. Кейбір оқушылар оқытушымен тікелей қарым-қатынас кезінде өз қабілетін төмен бағалап, жауап беру барсында айтайын деген ойын жеткізе алмай ұмытып қалады. Сөз тіркестерін, сөйлемдерді, сұхбаттарды құруда жіберген қателер, қате жіберіп алу қорқынышы т.б. жағдайлар.

Мұның бәрі студенттің психикасына әсер етіп, оның есте сақтау және ойлау қабілеттерін тежейді. Осыдан оқытушы мен студент арасында түсінбеушілік пайда болады. Осы тұрғыдан келгенде сабақта компьютерді пайдалану өте тиімді. Себебі уақыт көп кететін амалдарды орындаудан босатады.

Егер берілген материал бірсарынды болып, тек мұғалім ғана сөйлейтін болса, балалар тез шаршайды, сабақ сәтсіз болады. Осындай келеңсіз жағдайларды болдырмау үшін қазақ тілі сабағында компьютер арқылы студенттердің белсенділігін арттыратын ойындық элементтер қолданса тиімді болушы еді. Себебі студенттерге ребустармен, суреттермен жұмыс, сөзжұмбақтармен, сондай-ақ анаграммалармен жұмыс істеген ұнайды.

Компьютермен оқытуда ең тиімдісі – электронды оқулық.

Білім беру жүйесін ақпараттандырудың негізгі талаптарының бірі - оқу үрдісінде электрондық оқулықтарды жасау және оны қолдану. Осы уақытқа дейін білім беру саласында тек мұғалімнің айтқандарын немесе оқулықты пайдалану қазіргі заман талабын қанағаттандырмайды. Сондықтан білім беру жүйесінде электрондық оқулықтарды пайдаланбай алға жылжу мүмкін емес. Соның нәтижесінде студенттердің пәнге деген қызығушылығы артып, шығармашылықпен жұмыс жасауына кең мүмкіндік ашылды.