Қазақ ұлттық университетіне түсу туралы мақала

ҚазҰУ – менің орындалған арманым.

Менің университетім – бұл менің бала кездегі арманым десем, артық айтқаным емес. Кішкентай кезімдегі ойлаған өмірімді сүрудің өзі нағыз бақыт емес пе? Үлкен әпкем 2010 жылы Әл-Фараби атындағы Қазақ Ұлттық университетінің заң факультетін бітірген кезде, өзімнің ең алғашқы махаббатымды көргендей болдым. Ауылда өскеннен кейін бе, бұндай әдемі ғимаратты, университет ауласында бақытты болып жүрген студенттерді көрген кезде, тезірек мектепті сәтті бітіріп, осы университетке оқуға түсуді мақсат етіп қойдым. Себебі, университет студенттеріне көптеген мүмкіндіктер берілгенін көрдім. Айта кетер болсам, интернет орталығы, Ө.А. Жолдасбеков атындағы студенттер сарайы, мұражай, тамақтандыру комбинаты, студенттерге қызмет көрсету орталығы «Керемет», компьютерлік-техникалық жабдықтар, WI-FI интернет желісі, ауқымы кең спорттық кешен сынды орталықтар орналасқан. Онымен қоса университет аумағында ең бай кітапхана – Әл-Фараби атындағы кітапхана орналасқан. Қойнауы кітапқа бай, зәулім сарайлы кітапханамызда әр студент өзінің керегін еш қиындықсыз қол жеткізе алады. Осындай көріністі көрген 3-інші сынып оқушысының көзіне бұл нағыз бақыт болып көрінді.

Уақыт зымырап, көзді ашып жұмғанша, 3-інші сыныптан 11-інші сыныпқа қадам басыппын. Сол балалық арманымды еске алып, Қазақ Ұлттық университетіне түсу мақсатымды жүзеге асыруға тырыстым. ҰБТ-дан жақсы балл жинап, арманымдағы университетке, өзім сүйіп оқитын “математика” мамандығына мемлекеттік грант жеңіп алып, оқуға түстім. Солай, мен 2019 жылы механика-математика факультетінің, іргелі математика кафедрасының “математика және статистика” мамандығының 1 курс студенті атандым.

Студенттік кезең адам өміріндегі ең бір қимас, қызығы мол күндер. Ең бірінші күннен-ақ студенттік өмірім басталып кетті. Студенттік шақ деген әлдебір романнан оқып немесе ауызекі әңгімелерден естіп жүрген қызықты да байыпты шаққа еніп, тағы бір қадамымызды жасадық. Бұл үлкен өмірдің қызығы мен шыжығын көру сәті бұйырды.

Әр сәтіміздегі оқудың қиындығы студенттік балдай өмірімізге еш кедергі болмады. Өмірлік жанашыр достарымызды кездестірген осы ҚазҰУ болды. Барлық естеліктер мен өмірімімдегі бақытты сәттерім үшін ҚазҰУ – ыма мың алғыс білдіремін.

Бүгінгі таңда осы университеттің математика мамандығының 1-курс магистрантымын. Ғылым жолында талмай ізденіп, мемлекетіміздің дамуына үлкен үлес қосқым келеді.