ҚазҰУ білім шаңырағы туралы имидждік мақала

ҚазҰУ – білім шаңырағы.

ҚазҰУ – білімі мен таланты қатар табылатын студенттердің басын біріктіретін аяулы мекен. Қазіргі уақытта университетте 180-нен астам мамандық бойынша мамандар даярлайтын 16 факультет бар. Соның ішіндегі механика-математика факультетінің 1-курс магистрантымын. Факультет ғимаратында студенттерге барлық жағдай жасалған, оқу аудиториялары зертханалық және техникалық жабдықтармен қамтамасыз етілген. ҚазҰУ әрқашан студенттерге білім беруді ғана емес, ғылым саласында тың жаңалықтар ашуды мақсат еткен еліміздегі жетекші ғылыми-зерттеу оқу орны болып табылады. Әрине, Әл-Фараби атындағы ҚазҰУ-дың басты артықшылықтарының бірі – оның кәсіби профессорлық-оқытушылық құрамы, өйткені, қазіргі уақытта оның құрамында екі мыңнан астам оқытушылар бар, олардың ішінде көптеген профессорлар мен ғылым докторлары және кандидаттары бар.

Университет білім алушы тұлғаның жан-жақты дамуына, өзін-өзі кемелдендіруіне қажетті жағдай жасау үшін бар күш-жігерін салып, студенттік өзін-өзі басқаруға, көшбасшылық қасиеттерді тәрбиелеуге мол мүмкіндіктер тудыруда. Университет студенттерінің өмірі қызықты әрі әр алуандығымен ерекшеленеді. Ол тек дәрістер мен семинарларға қатысумен ғана шектелмейді. Олар шалқыған шығармашылық қуат пен жастық жалынды, балғын талантты шыңдайтын театр студиялары мен поэтикалық клубтарға, көңілді тапқырлар ойынына, пікірталас сайысына белсене қатысады. Қазіргі заманғы барлық талаптарға жауап беретін, жалпы алаңы 81000 шаршы метрді құрайтын, ҚазҰУ-дың 16 жайлы жатақханасында 5 мыңнан астам студент тұрады. Студенттердің әрқайсысының бөлмелері мен көңіл-күйлерінде жылы атмосфера мен үйдегі жайлылық байқалады.

Әл-Фараби атындағы Қазақ Ұлттық университеті – мен үшін әлемдегі ең үздік оқу орны және жастардың мәңгілік мекені. Менің білімге деген құлшынысымды оятып жүрген ҚазҰУ ұстаздарына алғысым шексіз. Бұл университетте алған білімім өмір бойына азық болатынына сенімім мол. Мен өз университетімді мақтан тұтамын және оның дамуына барынша үлес қосуға тырысамын.

Елімнің ең беделді даңқы болған,

ҚазҰУ абыройлы алтын ордам.

Мехматым мерейі асқақ мақтанышым,

Намысыңды жықпаймыз жалпы қолдан.

Шәкіртің боп шырқалды шаттық әнім,

Мехматыммен бастағы сәтті бағым.

Қазақтың ұл-қыздарын шыңға бастап,

ҚазҰУ жасай берші бақ-тұрағым!

Әл-Фараби атындағы ҚазҰУМеханика-математика факультетіМатематика мамандығының

1-курс магистранты Туребаев Б.Е.

Әл-Фараби атындағы ҚазҰУФилология факультетінің

оқытушысы Куралова А.Т.