Қимылды ойындар жинағы мектепке дейінгі балаларға

Ойынның аты: «Хан алшы» Ойынның салты: Ойынға 5-10 балаға дейін қатыса береді. Асық көп болу керек. Көп асықтың ішінен үлкенірек біреуін қызыл түске бояңдар. Осы асық «хан» болады. Алдымен санамақ арқылы ойын бастаушыны тағайындар алыңдар. Осы бала асықтың бәрін уысына жиып алып, отырған балалардың алдына шашып жібереді. «Ханның қалай түскенін байқап отыру керек. Егер «Хан» бүк, шік, тәйкі түссе, ойын бастаушы бала бармақтың көмегі арқылы сұқ саусағымен итере ыршытып, біріне – бірін дәлдей отырып тигізеді. Тигізген асықтарды өзіне алады.

Осы арада «ханды» тек ең соңғы өзі сияқты жатқан асықпен атып алуға болатынын ұмытпағандарың жөн. Ойын бастаушы басқа асықтарға қолымен не асықпен тиіп кетсе, ойынды келесі бала жүргізеді. Егер «хан» алшысынан тұрса, «ханды» әрқайсысы өз қолдарына түсіруге әрекеттенеді. «Хан» кімнің қолына түссе, сол бала жеңіске жетеді. Ойынды да сол жеңген бала бастайды.

Ойынның аты: «Алшы» Ойынның шарты: Ойнаушылар көңге бір- бірден асық тігеді де, ойыншылардың біреуі әрқайсысының сақасын жиып алып иіреді. Ондағы мақсаты ойыншылардың ойындағы кезектерін анықтау, яғни кім- кімнен кейін атады. Иірген кезде «алшы» түскен сақаның иесі-бірінші, «тәйкі» түскеннің иесі – екінші, «бүк» түскеннің иесі-үшінші, «шік» түскендікі – төртінші атады. Егер де бірнеше «алшы», «тәйке», «бүк», «шік» түссе, оларды жеке-жеке, яғни «алшы» түскендерді, содан соң «тәйке», «бүк», «шік» түскендерді қайтадан иіру керек. осылайша, кімнің нешінші болып ататындығын анықтағаннан кейін, осы кезек бойынша ойыншылар сақаларын иіре бастайды. «Бүк», «шік» түскен сақалардың иелері өзара кезектерімен көндегі асықтарды атады. Атқан кезде, атылған асық пен сақа бір жақты түссе, асықты алып ары қарай атқан кезде – сақа «алшы» түсіп, асық кез келген түрде жатса, сақа «тәйке» түсіп, асық та «тәйке» түссе, егер сақа да, асық та «бүк» не «шік» тұссе, мұндай жағдайда асықты алып, ары қарай ата береді. Қалған жағдайларда асықты алмайды,

асықты атқан кезде де ойыннан шығарып тастайтын жағдайы болады. Егер де асықты атқан кезде, сақа «тәйке» түсіп, асық «бүк» не «шік» түссе, онда сақа атылады да, ойынан шығып қалады.

Ойынның аты: «Секіртпе жіп» Ойынның мақсаты: Балалардың үйлесімді қимыл әрекет терең табандылық, ептілік, жылдамдық сияқты қасиеттерін жетілдіру, адамгершілікке тәрбиелеу. Ойынның міндеті: үйлесімді қимыл әрекеттерінен секіре алу. Шеберліктерін жаттықтыру. Ойынға қажетті материал екі –үш метр жіп. Ойынның мазмұны: тәрбиеші бір баламен жіпті айналыдырып тұрады. Балалар бірінен соң бірі тізіліп тұрады. Жіп айналған кезде әр бала өз кезегімен жіптен секіріп жаттығулар жасайды. Егер жіп секіріп тұрған баланың бір жеріне жанасып кетсе, ол бала жіпті айналдыруға шығады.

Ойынның аты: «Қаздар мен аққулар» Ойынның шарты: Ойыншылардың ішінен қасқыр, бақташы таңдап алынады. Басқа балалар қаздар болады. Ортадан бір сызық сызылады. Ол қаздардың тұратын жері. Қасына шығыршық қойылады. Ол қасқырдың үйі болады. Бақташы қаздарды жайып шығады. Олар далада жайылып жүреді. Бақташы: Қаздар! Қаздар! Қаздар: Га,га,га Бақташы: Тамақ жейсіңдер ме? Қаздар: Иә,иә,иә Бақташы: Ендеше ұшыңдар Қаздар: Жоқ, аш қасқыр бар, Жібермейді ол жолда. Бақташы: Тез! Ұшыңдар қалайда! Осы кезде қаздар қанаттарын қағып ұшып, бақташыға қарай жүгіреді. Қасқыр ұстағандарын шығыршықтың ішіне кіргізіп қояды. 2 рет ойнағандар ауысып, басқа балаларға кезек беріледі.