Қиындық пен жетістік туралы ойтолғау мақала

Өмір – тек жеңіс пен қуаныштардан тұрмайды. Ол – сынақ пен сабақтың, қуаныш пен көз жастың қоспасы. Қиындықсыз жеңіс болмайды, ал жетістік – тек төзім мен табандылықтың жемісі. Көп жағдайда адам қиындық келгенде әлсіреп қалады. Алайда шын мықтылар сол қиын сәттерден шыңдалып, биікке көтеріледі.

Менің ойымша, қиындық – бұл өмірдің мұғалімі. Ол бізді сабырға, күресуге, шыдамды болуға үйретеді. Әр қиындық адамның ерік-жігерін сынайды. Бірақ дәл сол сынақтар – жетістікке апаратын жолдың бір бөлігі. Мысалы, әлемге әйгілі кәсіпкер Стив Джобс жас кезінде өзі негізін қалаған Apple компаниясынан шығарылған. Бірақ ол мойымай, қайта дамып, сол компанияны әлемдік брендке айналдырды. Сонымен қатар Олимпиада чемпионы Серік Сәпиевті айталық. Жаттығу кезінде талай ауыр сәттерден өткен, жарақат алған, бірақ ешқашан берілмей, қазақтың атын әлемге танытты. Мұндай қиындықтар өзімнің де басымнан өткені рас. Адам баласы барлығы бірден бола салғанын қалайды емес пе? Дәл солай менде ойладым, қаладым. Алайда кейін барлығы біз ойлағандай мінсіз бола бермейтінін түсіндім. Әрбір үлкен жетістіктің артында – көрінбейтін еңбек, тынымсыз күндер мен күрес жатыр. Қандай жағдай болмасын біз бірден жақсы нәтижесін күтеміз. Бірақ жақсы нәтиженің өзі бірден келе қоймас. Бір рет шалындың ба тұруға тырыс, алға ұмтыл, өмірде берілмейтін жан ғана жақсы нәтижеге қол жеткізе алады. Қазақта: «Қиындық – ерге сын» дейді. Расымен, кім қиындыққа төтеп берсе, сол шыңға шығады.

Қорытындылай келе, қиындық – өмірдің бір бөлігі, ал жетістік – соған берілген сыйлық. Ешқандай табыс оңай келмейді. Егер сен құласаң – бұл жеңіліс емес, бұл қайта тұруға берілген мүмкіндік. Жеңіс – тек жолда берілмегендерге, сынақтан қашпағандарға келеді. Сол себепті, қиындықтан қорықпай, әр сәттен сабақ алып, алға ұмтылу керек. Себебі әрбір қиын күн – ертеңгі жарық болашақтың баспалдағы.