Тәуелсіздіктің негізі татулық пен бірлік туралы мақала

ТӘУЕЛСІЗДІКТІҢ НЕГІЗІ- ҰЛТАРАЛЫҚ,ТАТУЛЫҚ

ТҰРАҚТЫЛЫҚ,БІРЛІК

Қырықбай Күләш Мұқатайқызы -тарих пәнінің оқытушысы

Атырау жоғары көпсалалы «Болашақ» колледжі

Рухани жаңғыру ұлттық сананың түрлі полюстерін қиыннан қиыстырып, жарастыра алатын құдіретімен маңызды. Еліміз егемен болып, атымыз әлемге танылып жатқан кезімізде еліміздің өткенін жаңғырту - әр азаматтың қасиетті борышы деп түсіну керек.

Ия,Қазақ қазақ атанып,жеке дара ел болғалы не көрмеді.Бір жығылып,бір тұрып аласапыран тағдырларды басынан кешті. Қуғын да,сүргін де көрді.Босқын да,қашқын да,бодан да болды. Алайда,ата –бабаларымыз ешқашан еңкеймеді,сан ұрпақ екі тізгін,бір шылбырын ешкімге ұстатпай, бас иіп күн кешкеннен гөрі ұрпақ намысы үшін күресуді, елдіктің,егемендіктің туын асқақтатуды мұрат етті. Ғасырлар бойы күресті. Осындай ұлы күрестер арқылы рухы шыңдалған қазақтың таңы атты. Сөйтіп азаттық үшін алысып өткен ата-бабаларымыздың басты арманы орындалды. Халықты бір тудың астына жинап,біртұтас ел қылуды міндет еткен текті ұлдары Ә.Бөкейханов, А.Байтұрсынов, М.Шоқай, Т.Рысқұловтардың армандары орындалды.Әлем алдында Қазақстан деген атпен мемлекет пайда болды.

Ұлы бабамыз Абылай кезінде «Қазақтың Сарыарқадай сайын даласына, Есіл жағасына ел қондырсам, елімді – жерімді біртұтас мемлекетке айналдырсам » деп армандаған екен. Сол арман жүзеге асты. Тәуелсіздікпен бірге діліміз бен дініміз, рухымыз, дәстүріміз бен мәдениетіміз оралды. Төрткүл дүниені ат тұяғымен дүбірлеткен даңқты бабалардың «мәңгілік ел» мұраты қайта жалғанды. Сөйтіп Тәуелсіздік – тәуменді жұртқа тәуекел берді. Қазақстан үшін,қазақ халқы үшін Тәуелсіздік аспаннан түскен сый емес. Халқымыз бостандықты аңсап, Тәуелсіздікке зарығып жетті. Міне,отыз үш жыл артта қалған уақыт бұл күнде біз үшін бір ғасырға татитындай зор мазмұн мен шежіреге толды. Олай дейтін себебіміз осы уақыт ішінде жүз жылда атқарылатындай жұмыс тындырылды деп айтуға негіз бар.

Қазақтың ұлы ақыны Абай атамыздың «Жарық болсаң,жарықты кім көрмейді» дегеніндей, әлем елдері сол жарықты көріп,бағасын берді, мойындады және құрметтей бастады.

Қазақстанның ядролық қарудан бас тартуы, Қазақстан халқы Ассамблеясы институтының салынуы,келешек ұрпақ үшін Ұлттық қордың құрылуы,жастарға арналған «Болашақ» бағдарламасын, Кеден одағы мен Біртұтас экономикалық кеңістік құру, елорданың Алматыдан Ақмолаға көшіруі, еліміздің Еуропа қауіпсіздік және ынтымақтастық ұйымына төраға болуы,интеграциялық бастамалар, экономикалық жаңғыртулар және тағы басқа көптеген іс-шаралар Тәуелсіздіктің жемістері. Ішкі және сыртқы тұрақтылық сақталып, елдің қауіпсіздігі мен ұлтаралық келісім реттелді. Шынында да көп ұлтты республиканың тынышын кетірмей ұстау, ондағы әр ұлттың өкілдерінің тілін табу, көрші мемлекеттермен жақсы қатынас орнату үлкен жүректі, асқан ақылды, парасатты адамның ғана қолынан келетіні сөзсіз.

Қазақ билерінің атасы, әйгілі Майқы бидің «Хан әділ болса,халық ынтымақты болады» деген ұлы сөз бар. Осы қағидаға сай елімізде бірліктің,ынтымақтың рөлінің зор екендігін әрдайым есте ұстауымыз керек. Ынтымақ пен бірлікті бүгінгі Қазақстанның берік ұстанған нақты идеологиясы, ішкі саясат негізіне айналдыра білді. Еліміздегі береке мен бірліктің мекені Қазақстан халқы Ассамблеясы құрылды. Мемлекет басшысы Қасым-Жомарт Тоқаев Қазақстан халқы Ассамблеясының «Әділетті Қазақстан бірлік,тұрақтылық,даму» атты ХХХІІ сесиясында «Ассамблея – еліміздің саяси жүйесінің аса маңызды бөлігі. Бұл құрылым ел бірлігін нығайтуға орасан зор үлес қосып келеді» ,-деп айтқан болатын.