Қоғам және отбасы 9 сынып құқық негіздері жоспары

Сабақтың тақырыбы: Қоғам және отбасы

Сабақтың мақсаты:

Білімділік: Отбасы, неке ұғымдарымен түрлерімен таныстыру. Отбасындағы жастардың рөлі туралы түсінік беру.

Дамытушылық: Оқушылардың терең ойлау, өз ойларын ашық және толық жеткізе білу, пікір таластыру қабілеттерін дамыту.

Тәрбиелік: Адамгершілік, азаматтыққа тәрбиелей отырып, өз бойларында жауапкершілікті қалыптастыру.

Сабақтың түрі: жаңа сабақ

Сабақтың әдісі: сұрақ-жауап, түсіндіру, оқулықпен жұмыс, өздігінен жұмыс істеу.

Сабақтың корнекіліктері: слайд, бейнеролик, ҚР Конституциясы, Бала кұкықтары туралы Конвенция, отбасы құқығы кітабы, үлестірме қағаздар.

Сабақ барысы:

Ұйымдастыру кезеңі.

Сәлемдесу, оқушыларды түгендеу.

Оқушылардың зейінін сабаққа аудару.

Сыныпты топқа бөлу. (түрлі – түсті қағаздар бойынша)

І топ «Адам»

ІІ топ «Қоғам»

ІІІ топ «Құқық»

Үй тапсырмасын сұрау: сұрақ – жауап арқылы жүргізіледі.

1. Әлеумет сөзі қандай мағынада қолданылады? (Халық бұқарасы, көпшілік, жамағат мағынасында қолданылады)

2. Қандай да болсын белгілі бір категорияға (ұлт, тап) енетін адамдардың жиыны не деп аталады? (Әлеуметтік топ)

3. Кез келген қоғам өзінің бағыт алған саяси стратегиясына қарамастан нелерден тұрады? (таптардан, әлеуметтік топтардан және қабаттардан)

4. Макротоптар және микротоптар дегеніміз не? (Макротоптар – бүкіл қоғам, өркениет, ұлт сияқты ірі әлеуметтік тұтастықтар мен жүйелер жатады. Микротоптар – адамдардың бірігіп өмір сүруі мен еңбек ету үдерісінде құрылатын шағын топтар жатады)

5. Қазақстан қоғамын құрайтын барлық халық өзге өркениетті елдердегідей, негізінен неше тапқа бөлінеді? (Үш тапқа жоғары тап, орта тап, төменгі тап)

6. Жоғары тап өкілдерінің бүкіл халық арасындағы үлесі қанша? (2-3%)

7. Қоғамның әлеуметтік құрылымын түзетін таптар мен топтар бір – бірімен байланыссыз өмір сүре алмайды. Мұны не деп атаймыз? (Әлеуметтік қатынастар)

8. Әлеуметтік мобильділік дегеніміз не? (Ұғымы адамдардың қоғамда қалыптасқан таптар мен қабаттар жүйесінде еркін орын ауыстыруын білдіреді)

Жаңа сабақ.

Сабақты бастамас бұрын «ата – ана», «бала», «қоршаған орта» туралы қандай мақал-мәтелдерді білесіңдер?

«Қоғам және отбасы»

Сабақтың жоспары:

Отбасы – басты мақсат.

Отбасын құру ұстанымдары.

Отбасындағы балалар мен ата – аналардың құқықтары.

Отбасындағы қатынастар.

Қоғам дегеніміз – қоршаған ортадағы адамдардың өзара қарым – қатынас жасауын айтамыз.

Отбасы – ерлі – зайыптылардың, ата – аналардың, балалардың және басқа туыстардың арақатынасын реттейтін нормалардың, тәртіп үлгілерінің жиынтығымен сипатталатын әлеуметтік институт.

Қазақстан Республикасының Конституциясы 9 бөлім, 98 баптан тұрады.

І бөлім Жалпы ережелер 27-бап.

Неке мен отбасы, ана мен әке және бала мемлекеттің қорғауында болады.

Балаларына қамқорлық жасау және оларды тәрбиелеу ата – ананың етене құқығы әрі міндеті.

Кәмелетке толған еңбекке қабілетті балалар еңбекке жарамсыз ата – анасына қамқорлық жасауға міндетті.

Қазақстан Республикасы «Неке және отбасы» туралы заң 7 бөлім, 33 тарау, 283 баптан тұрады.

Бала құқықтары туралы конвенция Нью-Йоркте 1989 жылы 20 – қарашада қабылданып, Қ.Р 1994 жылы 11 – қарашадан бастап заңдық күшіне енді. 54 баптан тұрады.

Бүгінгі тақырыбымызға байланысты бейнеролик «Қарттар үйінен хат» тамашалаймыз. (3 мин)

Отбасының - толық, толық емес, кеңейтілген түрлері бар.

Ата – анасы және балалары бар отбасы – толық отбасы, ата - анасының біреуі ғана бар болса, ол толық емес отбасы, ата – анасы мен балаларынан басқа туыстары қосылып өмір сүріп жатқан отбасын кеңейтілген отбасы деп атайды.

Отбасын құру.

– ер мен әйелдің некелік одағының еріктілігі;

– отбасындағы ерлі-зайыптылардың құқықтарының теңдігі;

– бөгде адамның отбасы ісіне араласуын болдырмау;

– балалардың отбасында тәрбие алуына және олардың қамына көңіл бөлу;

– кәмелетке толмаған және еңбекке қабілетсіз отбасы мүшелерінің құқықтары мен

мүдделерінің қорғалуына көңіл бөлу;

отбасы мүшелері құқықтарының сот арқылы қорғалуының қамтамасыз етілуі;

– отбасындағы салауатты өмір салтын қолдау;

– отбасы мүшелерінің бір-бірінің қамын ойлауы.

Отбасының атқаратын функциялары:

– бала өсіріп, тәрбиелеу арқылы ұрпақ жалғастығын қамтамасыз ету;

– баланы әлеуметтенуге, қоғамда өмір сүруге дайындау;

– отбасы мүшелерін баспанамен, көлікпен, киіммен, тамақпен, материалдық құндылықтармен қамтамасыз ету.

Неке - отбасын құру мақсатын көздеген ер мен әйелдің ерікті және тең одағы.

Балалар мен ата-ана құқықтары мен міндеті.

Ата – ана өз балаларының денсаулығына қамқорлық жасауға міндетті, тәрбиелеуге құқылы және өсіп – жетілуіне жауапты.

Ата – аналары балалардың орта білім алуын қамтамасыз етуіне міндетті. Ата – аналары, әдетте баласы оқитын мекемені баласымен келісе отырып таңдайды. Ата – аналары баласының сабақтан қалуын, мектепте нашар қылық көрсетуін қолпаштамауы тиіс.

Ата – аналардың балаларды өз бетінше жеке тәрбиелеуге құқығы бар.

Ата – аналары әр түрлі теріс қылықтардың алдын алу үшін балаларын қадағалап отыруға міндетті.