Құттықтаймын, ана, мерекеңмен: ертеңгілік сценарийі

«Құттықтаймын, ана , мерекеңмен!» 8 наурыз мерекесіне арналған ертеңгілік сценариі

«Қарлығаш» мектепке даярлау тобы

Ақтөбе қ, №38 «Әлем» МДҰ

музыка жетекшісі: Тажбаева Д.М.

Аналар мерекесіне орай әсем безендірілген залға балалар музыка ырғағымен кіреді.Екі жаққа бөлініп отырады.

Жүргізуші: Қымбатты балалар, сүйікті аналар, апалар, құрметті әріптестер! Сіздерді көктемнің алғашқы мерекесі 8 наурыз халықаралық әйелдер күнімен құттықтаймыз. Құттықтай отырып, дендеріңізге саулық, жанұяларыңызға амандық, жүздеріңізге нұр, құшақтарыңызға гүл тілейміз. Әрқашан көктем гүліндей жайнап жүре беріңіздер!

Армысың, әжелерім, аналарым,

Мейірбан, аппақ көңіл даналарым,

Гүл көктемнің алғашқы мейрамымен

Құттықтайды сіздерді балаларың – деп

Құрметті аналар, сіздеріге арналған мерекемізді бастаймыз.

Алғашқы құттықтау сөз балабақша меңгерушісіне беріледі.

Еркем: Саламатсыздар ма, құрметті қонақтар! Ақ жаулықты әжелер, асыл да аяулы аналар !

Кенесары: Сіздерді 8 наурыз халықаралық аналар күнімен құттықтаймыз !

Еркем: Білесің бе, Ана деген асыл керемет жан. Менің анам мен не айтсам соны алып береді.

Кенесары: Ал менің анам ұйықтар алдында ертегі, ән айтып береді.

Еркем : Ән демекші бірігіп аналарға арнап мерекемізді әнмен бастасақ, оған қалай қарайсың?

Кенесары: Әрине, өте дұрыс, « Анашым» әнін қабыл алыңыздар.

Ән: «Анашым» (жақсы көрем бәріненде)

Жүргізуші: Жылылықтан жаралған,

Құшағы оның таң бекен

Менің айдай анамнан

Асқан сұлу бар ма екен?

Аналарға енді жырдан шашу шашайық.

Фархад: Аналардың ақ сүтінен нәр алған

Аналардың үмітінен жаралған

Сәби едік енді қазір ержеттік

Жүректерде биік мақсат, бір арман.

Ардақ: Мәпелейсің мені анам

Қолыңдағы құсыңдай,

Құлпыра өсіп дем алам,

Құшағыңда қысылмай.

Дайана: Ақ сүтіңнің нәріне

Тойып өстім ақ анам,

Төзе білген бәріне

Ақ анамдай бар ма адам?

С.Әлішер: Аналарды сүйеміз,

Сөзін ойға түйеміз,

Әжені де ардақтап,

Әдеппен бас иеміз.

Ерасыл: Ел жатқанда жатпаған,

Мен деп тыным таппаған

Бақыты үшін баланың

Аман сау жүр ақ анам

Аңсар: Әлпештеген аялаған,

Ақ сүт берген апатай,

Сәлем жазып бүгін саған ,

Мейрамыңмен құттықтаймын!

Еркем: Кенесары, бүгін біздің мерекеге бір сиқыршы келсеғой, шіркін.

Кенесары: Сенің бұл тілегіңді орындауға болады. Себебі бүгін сенің, осы отырған барлық қыздардың мерекесі ғой.

(музыкамен сиқыршы келеді)

Сиқыршы: Балалар, менің келуімді кім қалаған?

Кенесары: Қош келдіңіз, сиқыршы. Бұл менің досым Еркемнің және осы отырған барлық қыздардың тілегі десек те болады. Себебі бүгін қыздардың мерекесі ғой.

Сиқыршы: А- а-а , ендеше қыздар мерекелеріңіз құтты болсын. Бүгінгі мерекеде менің сиқырлы қобдишамнан қызықтарды тамашалайтын боласыңдар.

(Музыка ойналып, қобдишадан таяқшаны алып шығады)

4-жол тақпақ айтады.

Би: «Көңілді таяқша»

Сиқыршы. Балалар, қане аналарыңа арнаған тақпақтарың болса шығып айта беріңдер.

Ұлан: Анам менің әдемі,

Ұнайды сөз мәнері

Еркелетіп әрқашан

Маңдайымнан сүйеді.

Еркін: Жер бетінің ғұмыры,

Күн нұрымен арайлы.

Біздің үйдің жылуы,

Анамыздан тарайды.

Мұратбек: Әр сөзіңді жаттағам,

Жүрегімде сақтағам.

Анашым деп мақтанам.

Айналайын ақ анам.

Нұрхан: Үн қатасың бал тілмен,

Еркелеймін әр күн мен.

Құттықтаймын, анашым,

Сегізінші Наурызбен.

Перизат: Айналайын Анашым,

Көкте күн боп жанасың

Ет жүрегің елжіреп,

Құшағыңа лаасың.

Жеңісбек: Қолғабысқа жараймыз,

Тазалықты қалаймыз.

Ана еңбегін сыйлаймыз,

Үйдің ішін жинаймыз.

Е.Мадина: Әлпештеген баласын,

Ана бақыт, ана күн.

Әркім сүйіп өзінің

Мақтан етер анасын.

Ж.Дәулет: Баланың да тірегі,

Ананың да тірегі.

Шаншылмасын ешқашан,

Аналардың жүрегі.

Сиқыршы: Жарайсыңдар, балалар! Сендер менің сиқырлы қобдишамның тағы да қызықтарын көресіңдер ме?

( музыка ойналады. қорапты ашады. Ішінен билеп тұрған қыздың суреті шығады.)

Сіздер үшін сый құрмет,

Жан анашым мерейім.

Қаласаңыз бұралып,

Би де билеп берейік

Би: «Чуао»