Қыс мезгілі мен қар тақырыбына арналған материал

Алғашқы қар шығарма

Жоспар:

1.Алғашқы қардың түсуі

2.Атаммен бірге атқарған іс

3.Атамның әңгімесі

4.Өзімнің іс әрекетім туралы

Алғашқы қар биыл біздің ауылға ерте түсті.Таңертең тұрсам,бүкіл әлем аппақ түске боялып жатыр.

Атам аулада қар күреп жүр.Мен де қолыма күрегімді алып,атама көмектесуге кірістім.Атам екеуміз әп-сәтте ауладағы қарды күреп,үйіп тастадық,жұмыс арасында атам әңгімесін айтып жүрді.Мен атамнан сол күні көп нәрсені үйрендім.Қар әртүрлі болып жауады екен.Егер жұқа болып жауса «қырбық қар »деп атаймыз. «Қырбық қар»аз жауып,тез еріп кетеді.Мұнан басқа «мұздақ қар»деген болады.Оның үстін мұз торлоған,көкшіл түсті,беті жылтыр қар.Ал «омбы қар»деген аттың бауырына дейін жететін қалың қар.Мұндай қар әсіресе солтүстік аудандарда көп жауады.Біздің өңірде ондай қар сирек түседі екен.Міне,осындай қызық әңгімені тыңдап,құлақ құрышын қандырып алған соңатам екеуміз шәй іштік.Мен атам айтқан қар түрлерін ішімнен қайталаумен болдым.Өйткені ертең мектепке барған соң достарыма жұмбақ етіп жасырамын.Олар таба алмаса,өзім айтып достарыма түсіндіремін.

Осыдан кейін қызығушылығым артып,қар туралы мәлімет жинай бастадым.Бұдан басқа «сонар қар»деген болады екен.Ол ең алғаш жауған қар.Ал «сүрі қар»дегенәмәз ерте түсіп,ерімей,қыс бойы қалыңдаған тозаң топырақ сіңіп,беті күлгін тартқан нығыз қар екенін біліп алдым.Осыларды білген соң қазақ тілі неткен ғажап,неткен бай деген қорытындыға келдім.Тілді әрі қарай зерттеп,жаңалық ашуға,халықтың арасында көп айтылмай жүрген бізге беймәлім сөздерді жинап,зерттеуге деген құмарлық пайда болды менде.Келешекте тіл маманы болсам осының бәрі бір кәдеге жарайтын шығар деген асқақ арман маған күш берері сөзсіз.