Қыздар тәрбиесі туралы психологиялық баяндама

«Қыздарға ұлттық тәрбие туралы»

Қыз емес, қыздың аты қызыл алтын,Көрінер толған айдай жүзі жарқын.Үлкеннің алдын орап сөз сөйлемес,Халқының сақтай білген ізгі салтын.

«Қызға қырық үйден тыю» деген халқымыздың дана сөзі бар. Оған бойжеткен шағына дейін ақыл-кеңесін айта отырып, салт-дәстүрімізді бойына дарытып, әйел-ана атануда қандай асыл қасиеттерді санасына сіңіру керектігі нақты айтылады. «Қыз — жат жұрттық» демекші, ата-бабаларымыз қыздарымызды қонақ деп есептеп, оған зор құрмет көрсетіп, барған жерінде бағының ашылуын ерте бастан қамдаған. Бүлдіршін қыздың ертең ибалы келін, содан соң абзал ана атануы жолындағы тәлім-тәрбиесіне жеңіл-желпі қарамаған. Қыз баланың келешекте ана, ақ босағаның аруы, шаңырақтың құт-берекесі екенін ұғындырып, әдептілікке, ибалыққа, инабаттылыққа, мейірімділікке, шыншылдыққа баулып, теңін тауып, ерте отбасын құруын қамтамасыз еткен.

Ал, бүгінгі күннің талабы мүлдем өзгеше. Заңда 18 жасқа толмаған жастарымызға неке қиюға рұқсат етілмейді. Қазіргі нарық заманында білім алуды, маман атануды алдыңғы орынға қойып, басты назарда ұстайтындардың қатары көбейді. Өз саласында адал қызмет атқарып, шетелдерде кәсіби біліктілігін шыңдап, ғылымға ден қойып, жетістіктерге жетіп жүрген жастарымыздың қоғамымызда аз еместігі қуантады.

Бүгінгі таңда мектеп жасындағы кейбір жасөспірім қыздарымыздың арасында ерте жетіліп, алдамшы сезімге бола, өмірлік жарымды кездестірдім деп ғашығына ілесіп тұрмыс құрып кетіп жатқандары да баршылық. Ресми деректерге сүйенсек, әрбір 20 қазақстандық қыз бала, 16-19 жасында заңды некеге тұрып үлгереді екен. Тіпті ата-анасына да ескертпестен, мектептегі оқуын тастап, болашақ жарының үйіне кетіп қалған қыздарымыздың да бар екенін жасыруға болмайды. Алаңсыз балдырған күн өмірдің қайталанбас ең керемет шағы емес пе?! Бүгінгі күні кейбір қыздарымыз балалықпен ерте қош айтысып, бой жетуге асығады. Тұрмыс құру олардың біреуінің балалық шақтан бергі арманы болса, екіншісі үшін дербес өмірге ұмтылуы саналып, ал бірқатары өмірдегі қиындықтардан шаршап, сол мәселелерді шешіп беретін жанында арқа сүйер азаматының болғанын қалайды. Осындай мақсаттармен олар сүйген жарымен тезірек отау көтеруді армандайды. Біреудің босағасына барып келін атануға, сол үйдің отымен кіріп, күлімен шығуға асығу арқылы өрімдей жас қыздарымыздың өз болашақтарына балта шауып жатқандарын түсінбейтіні…