Шаттық шеңберін өткізуге арналған материал мектепке дейінгі топ

№1 Шаттық шеңбер

Амансың ба, Алтын Күн?

Амансың ба, Көк Аспан?

Амансың ба, достарым?

Сендерді көрсем қуанам.

№2 Шаттық шеңбер

Біз қандаймыз, қандаймыз,

Шұғылалы таңдаймыз!

Күлімдеген күндейміз!

Еш уайымды білмейміз.

№ 3 Шаттық шеңбер

Сәлеметсіз бе, апай?

Сәлеметсіз бе, ағай?

Есенсіз бе, әжей?

Амансыз ба, атай?

№ 4 Шаттық шеңбер

Күндей жадырап,

Жұлдыздай жарқырап,

Судай мөлдір таза көңілмен,

Бүгінгі күнімізді бастайық.

№ 5 Шаттық шеңбер

Жарқырап күн де ашылды,

Айналаға гүл шашылды.

Қайырлы күн! Біз көңілді баламыз!

Қайырлы күн! Біз сүйкімді баламыз

№ 6 Шаттық шеңбер

Бақшамызға барғанда,

Жолыққан бар жандарға.

Ертемен ақ пейілмен:

«Қайырлы таң!» деймін мен.

Күндіз де елді елеймін,

«Қайырлы күн!» - тілеймін.

Үйге кешке келемін,

Не дерімді білемін:

«Кеш жарық!» деп кіремін.

№ 7 Шаттық шеңбер

Баршаға сыйла махаббат,

Қуансын бар адамзат.

Сан есеге көбейіп махаббатың,

Тиеді саған шапағат.

№ 8 Шаттық шеңбер

Қайырлы таң, Аспан Ата!

Қайырлы таң, Жер Ана!

Амансыз ба?

Есенсіз бе?

№ 9 Шаттық шеңбер

.Достық іс пен қасты да,

Жеңеріме сенемін.

Ақыл, сана, біліммен,

Өнеріме сенемін.

№ 10 Шаттық шеңбер

.Қуан, шаттан, алақай,

Қуанатын күн келді.

Күліп шықты күн бүгін,

Қайырлы таң! Қайырлы күн!

№ 11 Шаттық шеңбер

Алдымыздан кезіккен,

Көп танысты көреміз.

Бәріне де ізетпен

-Сәлеметсіз бе, ағай?-деп

-Сәлеметсіз бе, апай?-деп

-Есенсіз бе, әжей?-деп

-Амансыз ба, атай?-деп

-Ұл-қыз сәлем береміз,

-Өнегелі өренбіз.

№ 12 Шаттық шеңбер

Аспан Атадан күш-қуат алайық.

Армысыз, қайырымды Аспан Ата!

Армысыз, мейірімді Жер-Ана!

Армысыз, шұғылалы Алтын Күн!

№ 13 Шаттық шеңбер

Еңбек етсем ертеңгі,

Бақытыма сенемін!

Мақсатыма жеткізер

Уақытыма сенемін!

№ 14 Шаттық шеңбер

Ойнасын, мейлі ойнасын,

Ойынға ешбір тоймасын.

Алаңсыз болып ай-күнің

Жақсылық бүгін тойлансын!

№ 15 Шаттық шеңбер

Мен келдім, міне, бүгін ортаңызға,

Амандық тілеп сізге, баршаңызға.

Саулығын берсін деймін бәрімізге,

Келесі кездескенше жаңа күнге.

№ 16 Шаттық шеңбер

Жарқын болсын өміріміз,

Жаздың әсем таңындай.

Таза болсын көңіліміз,

Таудың аппақ қарындай.

№ 17 Шаттық шеңбер

Шеңберге мен шақырамын,

Мейіріммен бас қосуға.

«Өзін-өзі тану» пәні

Көмектесер достасуға.

№ 18Шаттық шеңбер

Қайырымды жандар айнала,

Шеңберге келсін жайлана.

Жалықпастан қайта біз,

Махаббат сөзін айтамыз.

Сүйеміз барлық әлемді,

Әлемдегі бар елді.

Бақыттымыз осы біз

Қасымызда досымыз!

№ 19 Шаттық шеңбер

Балабақшам, армысың,

Сені қатты сүйемін!

Достарым, аман бармысың,

Сендерді қатты сүйемін!

№ 20 Шаттық шеңбер

.Адал жақсы ниетпен

Бар адамға бақ тілеп.

Жарып шыққан жүректен,

Сөздің бәрі-Ақ тілек!

№ 21 Шаттық шеңбер

Отбасының гүліміз,

Көңілді өтер күніміз.

«Қайырлы таң!» деп айтамыз

Бір болып, кеште қайтамыз.

№ 22 Шаттық шеңбер

Досың сені қалдырмайды қиынға,

Сұрамайды сенен артық бұйым да.

Нағыз дос деп осыны айт,

Көңілдердің хошын айт!

№ 23 Шаттық шеңбер

Көк аспанда күн күлсін,

Бірге күлсін бүлдіршін.

Көк аспанда күн күлсін,

Жерге ұдайы нұр құйсын.

Көк аспанда күн күлсін,

№ 24 Шаттық шеңбер

Ұл қолында ту жүрсін.

Қыз қолында гүл жүрсін,

Көк аспанда күн күлсін,

Бірге күлсін бүлдіршін.

№ 25 Шаттық шеңбер

Бақыт-біздің сиқырлы шеңберіміз,

Бақыт-біздің достарға сенгеніміз.

Бақыт-таңнан біреумен достасуың,

Бақыт-кеште достармен қоштасуың.

№ 26 Шаттық шеңбер

Бақытты дәйім армандап,

Досқа да бақыт тіледің.

Күтеді сені алдан бақ,

Жақсылық етсең үнемі.

№ 27 Шаттық шеңбер

Қоңырау біздің сиқырлы,

Сыңғырлап тағы ән салды.

Шақырды түріп ұйқыңды,

Шеңберге тұр,-деп баршаңды!

№ 28 Шаттық шеңбер

Қайырлы таң, құсқа, аңға да,

Қайырлы таң, жайдары жанға да.

Қайырлы таң алға ассын,

Кешке дейін жалғассын!

№ 29 Шаттық шеңбер

Күн күлімдеп нұр төкті, бізге жолдап..

Сәлем!

Жақсы сөздер нұр септі, бізге жолдап...

Сәлем!

Еске сақтап кеңесті, достарға сыйла...

Сәлем!

Кел, қосылып айтайық бір-бірімізге...

Сәлем!

№ 30 Шаттық шеңбер

Достарменен бір жолда

Иықтасып жүреміз.

Қиындықта қол ұшын

Береріне сенеміз.

№ 31 Шаттық шеңбер

Әдеп сақтап әманда,

Әрбір адал адамға.

Жасасаң бір қамқорлық,

Қайтарады саған да.

№ 32 Шаттық шеңбер

Шеңбер бойлап жүреміз,

Әр гүлге көңіл бөлеміз.

Сұлулық пен махаббатты

Сезініп өмір сүреміз.

№ 33 Шаттық шеңбер

Қоршаған өмір әлемі,

Не деген көркем, әдемі!

Сол сұлулықты сақтайық,

Мадақтайық, мақтайық!

№ 34 Шаттық шеңбер

Жер-Ана, саған мың алғыс,

Сыйлайсың бізге қуаныш.

Жазда, күзде, қыста да,

Көркемсің көктем тұста да!

№ 35 Шаттық шеңбер

Біз кішкентай баламыз,

Қазақстанда тұрамыз.

Отанды біз сүйеміз,

Мақтаныш оны қыламыз.

№ 36 Шаттық шеңбер

Қазақстан- туған жер,

Сені қатты сүйемін.

Көлдер, таулар, даламды,

Отаным деп білемін!

№ 37 Шаттық шеңбер

Кел балалар, күлейік!

Күлкіменен түлейік!

Күлкі көңіл ашады,

Күліп өмір сүрейік!

№ 38 Шаттық шеңбер

Арым таза, ақ көңіл,

Адалдыққа сенемін.

Абыройлы, ақ ниет,

Адамдыққа сенемін!

№ 39 Шаттық шеңбер

Бақшамызға барғанда,

Жолыққан бар жандарға.

Ертемен, ақ пейілмен,

«Қайырлы таң!» деймін мен.

№ 40 Шаттық шеңбер

Кел, балалар, күлейік,

Күлкіменен түлейік,

Қабақ түйген не керек?

Көңілді боп жүрейік!

№ 41 Шаттық шеңбер

Анам маған-Үлкенді сыйла деген,

Сол сөз маған ізгілік құйған ерен.

Үлкендерден ауысқан кішілікті

Үлкендердің өзіне сыйға берем.

№ 42 Шаттық шеңбер

Ән салуға барамыз,

Досымызды табамыз.

Сәлемет пе! Міне, мен!

Доспын енді сенімен.

№ 43 Шаттық шеңбер

Достығымыз берік боп,

Бекітейік беріп қол.

Қуанышты шеңберге,

Қандай жақсы қол береген!

№ 44 Шаттық шеңбер

Жақсылық көрсең біреуден,

«Мен қандаймын»деп ойла.

Жамандық көрсең біреуден,

«Мен қандаймын?»деп ойла.

№ 45 Шаттық шеңбер

Жүрегім кім менің?

Мен

Тірегім кім менің?

Мен.

Жаным кім менің?

Мен

Сәнім кім менің?

Мен

Ботақаным, бағлан қозым,

Не деген тәтті баласың өзің.

№ 46 Шаттық шеңбер

Достарды біз қолдаймыз

Қиын шақта қорғаймыз,

Біздің топта ұл-қыздар,

Тату-тәтті ойнаймыз!

№ 47 Шаттық шеңбер

Жарқырап күн де ашылды,

Айналаға нұр шашылды.

Қайырлы күн! Біз көңілді баламыз!

Қайырлы күн! Біз сүйкімді баламыз!

№ 48 Шаттық шеңбер

Армысың шапағатты Күн-Ана!

Армысың қайырымды Аспан-Ана!

Армысың мейірімді Жер-Ана!

Құт дарыт, бар әлемді жарылқа!

№ 49 Шаттық шеңбер

Аспан түрді түндігін

Жерге сәуле жайылды.

Неткен ашық күн бүгін,

Қайырлы таң, қайырлы!

№ 50 Шаттық шеңбер

Отан деген-атамекен,

Отан деген-туған жер.

Отан-ана,

Отан-үлкен,

Қазақстан-туған ел!

№ 51 Шаттық шеңбер

Бала, бала, баламыз,

Бақшамызға барамыз.

Күні бойы қызыққа,

Батамыз да қаламыз.

№ 52 Шаттық шеңбер

Жайлауымдай жазықпын.

Өзенімдей өршілмін

Гүлдерімдей нәзікпін.

Қуат алған өзіңнен,

Туған елдің ұлымын.