Тәрбие мен білім егіз әдістемелік баяндама

Өнер мектебі

Тәрбие мен білім –егіз

2019 жыл

Тәрбие мен білім-егіз

Бүгінгі таңда білім беру жүйесіндегі бірінші міндет-ол дүние жүзі елдерінде жастарды бейбітшілік рухта ынтымақтастыққа,руханилыққа тәрбиелеу және әлемдік мәдениет пен әр халықтың ұлттық мәдениетін кіріктіре меңгерту.

Екіншіден,жастардың бойындағы адами құндылықтарды:қайырымдылықты,сүйіспеншілікті дамыту,сөйтіп тәрбиелей отырып оқыту.

Үшіншіден,білім беру жүйесінің бұрынғы ағартушылық бағытын сақтай отырып,басым бағдарын жеке тұлғаның рухани-адамгершілік тұрғысынан кемелденуіне аудару.

Ендеше,жеке тұлғаның адамды адам ете түсетін қасиетін ашып көрсету,яғни руханилығын дамыту –заман талабы. Егер адам руханилығынан айырылса,онда ол эмоция мен сезімнен айырылады,жалаң рационализм мен прагматизмнің құлына айналады.Сөйтіп материалдық табысты негізгі мақсатқа айналдырған қоғамдық даму адамзатты рухани жұтандыққа душар етіп,құндылық бағдарын өзгертіп жіберуі мүмкін.

Жалпы адамзаттық құндылықтар жеке тұлғаның бойында өмірге келген сәтінен бастап бірге дамиды,жасы ұлғайған сайын қоршаған ортасына сәйкес бірге қалыптасады.

«Әр заманның өз адамды» деген қағиданың мәніне терең үңілетін болсақ,өмір тәжірибесі өзінің нәтижесімен көрсете отырып,дәлелдеп береді. Бұл көзқарас Қазақстан Республикасының білім туралы заңында көрініс тапқан.Онда: «Білім беру-бұл қоғам мүшелерінің адамгершілік,интелектуалдық мәдени дамуының жоғары деңгейін және кәсіби біліктілігін қамтамасыз етуге бағытталған тәрбие мен оқытудың үздіксіз процесі» деп жазылған.Ал «Қазақстан Республикасы жалпы білім беретін мектептері білім мазмұнын гуманитарландыру тұжырымдамасында» білім беру жүйесінің негізгі міндеттері төмендегідей көрсетілген:

-жеке адамның рухани қабілет мүмкіндіктерін ашу,адамгершілік пен салауаттылықтың берік негіздерін қалыптастыру,әрбір адамды дамыту үшін жағдайлар жасау;

-жеке адамның шығармашылық қабілеттері мен өзіндік ерекшеліктеріне қарай тәрбиелеуді дамыту.

Соның ішінде гуманитарлық білімнің мазмұнын жаңарту мақсатында оқыту процесін ізгілендіру және баланың дербес қабілетін ескеріп,тереңдетіп оқыту мақсаты көзделген.Бұл мақсатқа жетіп,алған міндеттердің орындалуы ,ең алдымен жеке тұлғаның рухани құндылықтарының дамуына баса назар аударуды қажет етеді.

Бұл жөнінде Қазақстан Республикасы Білім және ғылым министрлігінің тәрбие тұжырымдамасында: «Бастауыш мектептің өзінде баланың танымдық және психологиялық мүмкіндіктерін жетілдіріп,адамның күнделікті өмірінде білім алудың қаншалықты маңызды екенін көзін жеткізу қажет.Бұл кезеңде гуманитарлық –эстетикалық бағыттағы пәндердің кеңінен енгізу керек,өйткені осы жастағы балалар әсершіл әрі ұғымтал келеді.

Бала бастауыш мектепті бітірген кезде төңірегіндегі оқиғалар жайындағы әсерін қисынды да жүйелі баяндап,жанындағы адамдармен ешбір қиындықсыз белсене қарым-қатынас жасауды үйренуге,алған білімін түсініп,өмірде қолдана білуді талап ететін дағдыларды толық игеруге тиіс» деп көрсетілген нұсқау да біз көтерген мәселенің қоғам талабынан туындап отырғандығын дәлелдейді.