Тәрбие тал бесіктен басталады тақырыбындағы мақала

Эссе

«Тәрбие – тал бесіктен»

«Бала тәрбиесі – өнер, жеке бір ғылым иесі болуды тілейтін өнер»

М.Жұмабаев.

Тәрбие дегеніміз-ата-бабамыздың кейінгі ұрпаққа мирас етіп табыстайтын өнегесі, үлгісі, әдет-ғұрпы мен рухани байлығы.Тәрбие арқылы адам тағдыры шешілетінін, оның білімді тұлға болып қалыптасатынын, елдің берік тірегі болатынын көрсетеді.Балалар тәрбиесіне, ұрпақ тәрбиесіне қай кезеңде болмасын үлкен мән берілген.Өйткені бала-біздің болашағымыз.

«Тәрбие тал бесіктен» деген нақыл сөздің мағынасы тереңде жатыр.Өмір шындығына жүгінсек, тәрбие бастауы, ананың сүтінен нәр алып өскен ортасына байланысты.Тәрбие отбасынан, ата-анадан басталады.Бала бақытының кепілі - ата-ананың өнегелі тәрбиесінде.Баланың отбасындағы тұлғалық қасиетін жетілдіретін жағдайдың бірі-отбасы ішілік және отбасынан тысқары атқарылатын еңбек.Отбасындағы күнделікті тұрмыс қажеттігін қамтамасыз етуден туындайтын еңбек баланы әлеуметтік өмірде де ересек өмірге де тәрбиелейді.Сондай еңбектің арқасында баланың жауапкершілігі артып, еңбек ету қажеттігін түсінеді.

Заманға сай отбасында бала тәрбиелеу аса үлкен жауапкершілік пен білімді талап етеді.Ата-ананың ең басты қызметтерінің бірі-өнегелі тәрбие беру. Шыр етіп дүниеге келгеннен бастап, өмір бойы рухани жағынан жетілдіріп, оны отбасы тәрбиесінде қоғамдағы өзгерістермен тығыз байланыстырып отыру қажет,содан тәрбие бастау алады.

Бала тәрбиесі жөнінде Абай:«Адамның жақсы болуы тегінде емес, тәрбиесінде, ақылында, өнер, білімінде.Адамға үш алуан адамнан мінез жұғады:ата-анадан, ұстазынан, құрбысынан.Әсіресе олардың қайсысын жақсы көрсе, содан көп жұғады», - деп осы үшеуінен баланың болашағы шешілетінін ескерткен.Ал әл-Фарабидің:«Адамға ең алдымен білім емес, тәрбие керек.Тәрбиесіз берілген білім адамзаттың қас жауы», -деген.

Бүгінгі бала-ертеңгі болашақ жаңа әлем.Жүйелі білім беріп,ынта-ықыласын дұрыс бағыттауды, қабілет қасиеттерін дамытуды ерте жастан бастауымыз керек. Мен мектепалды сыныбында тәрбиеші болып жұмыс атқарамын. Балаларды оқытып қана қоймай сонымен бірге жақсы тәрбие беруде өз үлесімді қосудамын.Күнделікті іс-әрекет кезінде балалармен ойнай отырып, тәрбиені қатар алып жүреміз.Болашағымыз айқын болсын десек, бала тәрбиесіне жан-жақты болып жұмыс жасауымыз керек.Маған балалармен жұмыс жасаған ұнайды.Тәрбиеші мамандығын таңдағаныма еш өкінбеймін!

Қатысушының аты-жөні

Капарова Жулдуз Сайрановна

Еңбек өтілі

24 жыл

Мекен-жайы

Солтүстік Қазақстан Облысы, Петропавл қаласы

Байланыс номері