Тәрбиешілік мамандық туралы мақала: мектепке дейінгі тәрбие

Мен үшін де осынау өмірімдегі ең қастерлі әрі қасиетті мамандық – тәрбиешілік.

ТӘРБИЕШІ – бұл әрдайым үлкен әріптермен жазылуға тиіс мазмұнды сөз деп танимын. Өйткені, біз елдің ертеңгі азаматтарын тәрбиелеудеміз. “Ел есінде бір жыл қалғың келсе – ас бер, он жыл қалғың келсе – ағаш отырғыз, ал мәңгі қалғың келсе – бала тәрбиеле” – дейді халық даналығы. Өскелең ұрпаққа тәлімді тәрбие сіңіру, болашаққа жарқын бағыт-бағдар беру, келешекке кемел боларлық ақыл-парасат меңгерту аса жауапты іс екені мәлім. Сондықтан да жауапкершілік жүгі ауыр сонау қажырлы іске бой ұрған әрбір маман қоғам арасында үлкен құрметке ие болатындай дәрежеге иек артуға тиіс. Мен үшін де осынау өмірімдегі ең қастерлі әрі қасиетті мамандық – тәрбиешілік. “Жол таңдауда жалтаңдауға болмайды” дегендей, әу баста ұлтымыздың, тәуелсіз еліміздің ертеңі боларлық бүлдіршіндерді тәрбиелеу жолын таңдағаныма еш өкінбеймін. Керісінше, ауыртпалығымен жауаптылығы қырықатанға жүк боларлық осы кәсіпті таңдау арқылы қоғамдық дамуға өлшеусіз үлес қосып келе жатқанымды мақтан етемін. “Кәсібің - нәсібің” дейді қазақ даналығы. Шын жүрекпен қалаған кәсіп арқылы ғана және жемісті еңбек арқылы өмірлік несібеңді, абырой-беделіңді, қоғам алдындағы құрметіңді еселей аласың.

Тәрбиеші болу – әр балаға екінші ана болуға парапар еңбек. Анадай мейірім мен қамқорлық таныту, аялы сөздермен ілтипат білдіріп, ізгіліктерге бағыттау біздің күнделікті еңбегімізде өріліп жатыр. Өйткені, бұл – бала жанын тереңнен сезінетін, өз ісін жан-жақты білетін, бүлдіршіндерді жан-тәнімен сүйе алатын нағыз маманның қолынан келетін жұмыс. Ұлы педагог Г. Песталоцци: “Егер де сүйе білмесең, тәрбиелеу құқығын жоқ”, деген екен.

Халқымызда “Жас келсе - іске” деген керемет сөз бар. Демек, мен бойымдағы жастық жігерімді, күш-қуатымды, жаңашылдығымды талапты әрі талантты шәкірт тәрбиелеуге жұмсауым керек. Болашақта өз тәрбиелеушілерімді биік белестерден көріп жатсам, сол үшін қзімнің аз да болса үлесім тиіп жатса, мен өзімді бақытты тәрбиеші-ұстаз деп білемін.

Қостанай облысы, Меңдіқара ауданы,

Боровской селосы,

МКҚК «Балауса» бөбекжай-балабақшасының

тәрбиешісі: Г. Б. Айгужина